Last Updated:
ఆసియా క్రీడలు 2026లో సెయిలింగ్, కాంపౌండ్ ఆర్చరీ, స్క్వాష్ ఈవెంట్లలో పతకాలు సాధించిన భారత అథ్లెట్లను ప్రధాని నరేంద్ర మోదీ అభినందించారు. క్రీడాకారుల పట్టుదల, ప్రతిభ యావత్ దేశానికే గర్వకారణమని ఆయన కొనియాడారు.
జపాన్‌లోని ఐచి-నగోయా వేదికగా జరుగుతున్న ఆసియా క్రీడలు 2026లో అద్భుత ప్రదర్శన కనబరిచి సెయిలింగ్, ఆర్చరీ, స్క్వాష్ విభాగాల్లో పతకాలు సాధించిన భారత క్రీడాకారులను ప్రధాని నరేంద్ర మోదీ గురువారం ఘనంగా అభినందించారు. అంతర్జాతీయ వేదికపై అసాధారణ నైపుణ్యంతో దేశ ప్రతిష్టను పెంచిన అథ్లెట్ల ప్రతిభను ఆయన ప్రత్యేకంగా కొనియాడారు. ఒత్తిడిని అధిగమించి కాంపౌండ్ ఆర్చరీ వ్యక్తిగత విభాగంలో కాంస్య పతకం సాధించిన గణేష్ మణి రత్నం తిరుమూరుపై ప్రధాని ప్రశంసల జల్లు కురిపించారు. తీవ్రమైన పోటీలోనూ సంయమనం, అచంచలమైన పోరాట పటిమ కనబరిచి అద్భుత విజయాన్ని అందుకున్నారని పేర్కొన్నారు. భవిష్యత్తు పోటీల్లో ఆయన మరిన్ని విజయాలు సాధించాలని ఆకాంక్షించారు.
అదేవిధంగా మహిళల స్క్వాష్ టీమ్ ఈవెంట్‌లో కాంస్య పతకం గెలుచుకున్న అనహత్ సింగ్, జోష్నా చినప్ప, తన్వి ఖన్నా, షమీనా రియాజ్‌‌ల బృందాన్ని ప్రధాని మోదీ అభినందించారు. ప్రతికూల పరిస్థితుల్లోనూ అద్భుతమైన సంకల్పంతో పోరాడి పోడియంపై సముచిత స్థానం దక్కించుకున్నారని ప్రశంసించారు.
భారత మహిళా స్క్వాష్ క్రీడాకారిణులు సాధించిన ఈ విజయం దేశంలో ప్రాచుర్యం పొందుతున్న స్క్వాష్ క్రీడ వైపు యువతను మరింతగా ఆకర్షించడానికి, వారిలో సరికొత్త స్ఫూర్తిని నింపడానికి ఎంతగానో దోహదపడుతుందని ప్రధానమంత్రి స్పష్టం చేశారు.
మరోవైపు సెయిలింగ్ పురుషుల, మహిళల స్కిఫ్ విభాగాల్లో రజత, కాంస్య పతకాలు కైవసం చేసుకున్న సెయిలర్ల కృషిని కూడా ప్రధాని కొనియాడారు. దేశానికి గౌరవం తెచ్చిన ప్రతి అథ్లెట్ శ్రమను గుర్తిస్తూ రాబోయే ఈవెంట్లలో భారత బృందం మరిన్ని పతకాలతో స్వదేశానికి తిరిగి రావాలని మోదీ శుభాకాంక్షలు తెలిపారు.
