ఇజ్రాయెల్‌కు చెందిన ఛానల్ 12 కథనం ప్రకారం.. హమ్మామీ అల్-ఖైదా భావజాలానికి ఆకర్షితుడైనట్లు, ఈ క్రమంలో పలువురు మత పెద్దలను కలిసినట్లు దర్యాప్తు అధికారులు భావిస్తున్నారు. తీవ్రవాద సంస్థలతో అతడికి సంబంధాలున్నాయా అన్న కోణంలోనూ ఆరా తీస్తున్నారు.

సెప్టెంబర్ 30న జరిగిన ఈ ఘటనలో.. అల్-హమ్మామీ కాక్‌పిట్‌లో భారతీయ కెప్టెన్ స్మిత్ మచ్చార్‌‌పై కత్తితో దాడి చేశాడు. దాంతో బోయింగ్ 737 విమానం ఒక్కసారిగా వేగంగా కిందకు దూసుకుపోయింది. గాయపడినప్పటికీ భారత పైలట్ చాకచక్యంగా కాక్‌పిట్ తలుపు తెరిచారు. వెంటనే ఇతర సిబ్బంది, ప్రయాణికులు అప్రమత్తమై కో-పైలట్‌ను అడ్డుకున్నారు. విమానంలో ప్రయాణిస్తున్న మరో ఇద్దరు ఆఫ్-డ్యూటీ పైలట్లు విమానాన్ని అదుపులోకి తెచ్చి, సౌదీ అరేబియాలోని తబూక్‌లో సురక్షితంగా ఎమర్జెన్సీ ల్యాండింగ్ చేయడంతో పెను ప్రమాదం తప్పింది. ప్రస్తుతం అల్-హమ్మామీని యూఏఈకి తరలించి విచారణ కొనసాగిస్తున్నారు. అయితే మీడియాలో పెద్దఎత్తున కథనాలు వస్తున్నప్పటికీ, నిందితుడి వివరాలు, గుర్తింపుపై యూఏఈ అధికారులు ఇంకా అధికారికంగా ఎలాంటి ప్రకటన చేయలేదు.