ఇలాంటి చర్యలు రాజకీయ కక్షసాధింపులో భాగమని పేర్కొన్న భూమన.. తన ప్రతిష్టను దెబ్బతీయడానికి పన్నిన కుట్రలను ప్రజలు గమనిస్తున్నారని అన్నారు. బి.ఆర్. నాయుడు గతంలో చేసిన కార్యక్రమాలు ప్రజలకు తెలుసని, ఇప్పుడు మాజీ ఉద్యోగులను వాడుకుని అసాంఘిక రాజకీయాలకు పాల్పడటం అత్యంత దుర్మార్గమని తీవ్రస్థాయిలో విమర్శించారు. తన జీవితమంతా ప్రజా ఉద్యమాలు, సామాజిక పోరాటాలకే అంకితం చేశానని, ఎప్పుడూ ఎవరి వద్దా పైరవీలు చేసి పదవులు పొందలేదని స్పష్టం చేశారు.

ధన ఆశ చూపించి, భయపెట్టి తన వద్ద పనిచేసిన వారిని ప్రభావితం చేసి మీడియా ద్వారా తనపై తప్పుడు ప్రచారాలు చేయాలని చూస్తే తాను ఏమాత్రం భయపడబోనని భూమన హెచ్చరించారు. ఎలాంటి ఒత్తిళ్లు వచ్చినా వెనక్కి తగ్గేది లేదని, జరుగుతున్న కుట్రలను ప్రజల ముందుకు తీసుకువస్తానని స్పష్టం చేశారు. తనను బలహీనపరచేందుకు ఎంత ప్రయత్నించినా తాను అదిరేది లేదని, బెదిరేది లేదని ధీమా వ్యక్తం చేశారు.

టీటీడీ వంటి పవిత్రమైన ధార్మిక సంస్థకు చైర్మన్‌గా వ్యవహరించే వ్యక్తి వినయం, నీతి, విలువలతో ఉండాల్సిందిపోయి నీచ రాజకీయాలకు పాల్పడటం అత్యంత బాధాకరమని భూమన ఆగ్రహం వ్యక్తం చేశారు. ధార్మిక సంస్థ ప్రతిష్టను దెబ్బతీసేలా వ్యవహరించడం నైతికంగానే కాక చట్టపరంగానూ తప్పేనని వ్యాఖ్యానించారు. ఇకపై బి.ఆర్. నాయుడు వ్యవహారాలపై మరింత పెద్ద ఎత్తున ఉద్యమం కొనసాగిస్తానని హెచ్చరించారు.