అమెరికా ఆర్థిక వ్యవస్థ ప్రస్తుతం రికార్డు స్థాయి లాభాలతో దూసుకుపోతోందని, స్టాక్ మార్కెట్ సరికొత్త రికార్డులను సృష్టిస్తోందని ట్రంప్ పేర్కొన్నారు. భారత్ కు ఏది కావాలన్నా అందించడానికి తాము సిద్ధంగా ఉన్నామని చెప్పారు. ఈ వేడుకలలో పాల్గొన్న అమెరికా విదేశాంగ మంత్రి మార్కో రూబియోను దేశ చరిత్రలోనే అత్యంత గొప్ప విదేశాంగ మంత్రిగా ట్రంప్ అభివర్ణించారు. ప్రధాని మోదీకి తన తరఫున ప్రత్యేక శుభాకాంక్షలు తెలియజేయాలని రాయబారి గోర్‌కు సూచించారు. తామిద్దరం ఎప్పుడు మాట్లాడుకున్నా ప్రధాని మోదీ క్షేమసమాచారాల గురించే ట్రంప్ మొదట అడుగుతారని రాయబారి సెర్గియో గోర్ ఈ సందర్భంగా గుర్తుచేశారు.

భారత్-అమెరికా భాగస్వామ్యం ట్రంప్, మోదీల వ్యక్తిగత బంధం వల్ల సరికొత్త ఎత్తుకు చేరుకుందని రాయబారి గోర్ కొనియాడారు. అమెరికా ఫస్ట్ అంటే అమెరికా ఒంటరిగా ఉండటం కాదని, రెండు దేశాలకు లబ్ధి చేకూర్చే అంశాలపై తాము కలిసి పనిచేస్తున్నామని చెప్పారు. తాను దిల్లీకి వచ్చి ఐదు నెలలు మాత్రమే అవుతోందని, ఇరు దేశాల మధ్య కుదిరిన తాత్కాలిక వాణిజ్య ఒప్పందం రాబోయే కొన్ని వారాల్లోనే అధికారికంగా ఖరారు కానుందని ఆయన కీలక ప్రకటన చేశారు. ఈ ఒప్పందం ద్వారా రెండు దేశాల్లో పెట్టుబడులు పెరిగి యువతకు పెద్ద ఎత్తున ఉద్యోగ అవకాశాలు లభిస్తాయని ఆశాభావం వ్యక్తం చేశారు.

ఈ చారిత్రాత్మక స్వాతంత్ర్య దినోత్సవాన్ని పురస్కరించుకుని దిల్లీ నగరంలో అమెరికా రాయబార కార్యాలయం సరికొత్త ప్రచారానికి తెరలేపింది. నగరంలోని వేలాది ఆటో రిక్షాలపై అమెరికాకు చెందిన చారిత్రాత్మక చిత్రాలతో పాటు డోనాల్డ్ ట్రంప్ చిత్రాలను ముద్రించి ప్రదర్శిస్తున్నారు. ఈ ప్రత్యేక ఆటోలు దిల్లీ వీధుల్లో తిరుగుతూ ప్రజలను విశేషంగా ఆకట్టుకుంటున్నాయి. మరోవైపు, ఈ పర్యటనలో భాగంగా అమెరికా విదేశాంగ మంత్రి మార్కో రూబియో, భారత విదేశాంగ మంత్రి ఎస్. జైశంకర్‌తో కలిసి ఇరు దేశాల రక్షణ, ఇంధన రంగాల పురోగతిపై సుదీర్ఘ చర్చలు జరిపారు.