229 పరుగుల భారీ లక్ష్యంతో బరిలోకి దిగిన ముంబై ఇండియన్స్‌కు ఓపెనర్లు శుభారంభం చేశారు. గాయం నుంచి కోలుకొని చాలా రోజుల తర్వాత రోహిత్ శర్మ బ్యాటింగ్‌కు వచ్చాడు. ఇన్ ఫామ్ బ్యాటర్ రయాన్ రికెల్టన్‌తో కలిసి రెచ్చిపోయాడు. వీరిద్దరు తొలి వికెట్‌కు 10.5 ఓవర్లలో 143 పరుగులు జోడించారు. అనంతరం రికెల్టన్ అవుటయ్యాడు. కాసేపటి తర్వాత రోహిత్ శర్మ కూడా పెవిలియన్ చేరాడు. దాంతో 177 పరుగుల వద్ద ముంబై 2వ వికెట్‌ను కోల్పోయింది. తిలక్ వర్మ (11), సూర్యకుమార్ యాదవ్ (12)లు నిరాశ పరిచారు. దాంతో ముంబై వెంట వెంటనే 2 వికెట్లను కోల్పోయింది. ఈ దశలో ముంబై శిబిరంలో కాస్త కంగారు మొదలైంది. అయితే నమన్ దీర్, విల్ జాక్స్ మిగిలిన పనిని పూర్తి చేశారు. ముంబైకి ఈ సీజన్‌లో ఇది మూడో విజయం. ప్రస్తుతం 10 మ్యాచ్‌ల్లో 6 పాయింట్లతో 9వ స్థానంలో కొనసాగుతుంది. ఇక లక్నో అధికారికంగా ప్లే ఆఫ్స్ రేసు నుంచి తప్పుకుంది. ప్రస్తుతం 4 పాయింట్లతో లీగ్ టేబుల్లో 10వ స్థానంలో కొనసాగుతుంది.

అంతకుముందు తొలుత బ్యాటింగ్ చేసిన లక్నో సూపర్ జెయింట్స్ 20 ఓవర్లలో 5 వికెట్లకు 228 పరుగులు చేసింది. నికోలస్ పూరన్ (21 బంతుల్లో 63; 1 ఫోర్, 8 సిక్సర్లు) పెను విధ్వంసం సృష్టించాడు. మొన్నటి వరకు బ్యాటింగ్ రాని వాడిలా ఆడిన పూరన్ మునుపటి లయను అందుకున్నాడు. మిచెల్ మార్ష్ (44) రాణించాడు. ఒక దశలో లక్నో12 ఓవర్లలోనే 160 పరుగులు చేసింది. కనీసం 250 పరుగులు చేస్తారని అంతా అనుకున్నారు. అయితే చివరి వరుస బ్యాటర్లు పేలవ ప్రదర్శన చేశారు. చివరి 8 ఓవర్లలో లక్నో కేవలం 68 పరుగులు మాత్రమే చేసింది. మార్క్‌రమ్ (31), హిమ్మత్ సింగ్ (41) టెస్టు బ్యాటింగ్ ఆడారు. ఫలితంగా లక్నో చేయాల్సిన స్కోరు కంటే కూడా ఒక 30 పరుగులు తక్కువే చేసింది.