ఈ వ్యవహారంపై స్పందించిన భాను ప్రకాష్ రెడ్డి.. కర్ణాటక ఉప ముఖ్యమంత్రి డీకే శివకుమార్ తీరుపై విమర్శలు గుప్పించారు. టీటీడీ నిబంధనలు, సంప్రదాయాలను పక్కనబెట్టి నిర్ణయాలు తీసుకోవడం సరికాదని అన్నారు. కర్ణాటక ఛౌల్ట్రీలను కర్ణాటక టూరిజంకు అప్పగించాలనే ప్రతిపాదన వెనుక వ్యాపార ప్రయోజనాలు ఉన్నాయని ఆరోపించారు. తమకు అనుకూలమైన వ్యక్తులకు షాపులు, రెస్టారెంట్లు కేటాయించేందుకే ఈ నిర్ణయం తీసుకున్నారని విమర్శించారు.

1987 టీటీడీ చట్టం ప్రకారం వసతి సముదాయాలను సబ్‌లీజుకు ఇచ్చే అవకాశం లేదని భాను ప్రకాష్ రెడ్డి పేర్కొన్నారు. తిరుమల వంటి పవిత్రమైన ధార్మిక క్షేత్రాన్ని ధనార్జనకు, రాజకీయ ప్రయోజనాలకు వేదికగా మార్చే ప్రయత్నాలను అంగీకరించబోమని స్పష్టం చేశారు. టీటీడీ వ్యవహారాల్లో నిబంధనలు, సంప్రదాయాలకు ప్రాధాన్యం ఇవ్వాలని, వాటికి విరుద్ధంగా నిర్ణయాలు తీసుకుంటే భక్తుల మనోభావాలు దెబ్బతింటాయని పేర్కొన్నారు.

కర్ణాటక ఛౌల్ట్రీలను కర్ణాటక టూరిజంకు కేటాయించే ప్రతిపాదనను వెంటనే వెనక్కి తీసుకోవాలని భాను ప్రకాష్ రెడ్డి డిమాండ్ చేశారు. ఈ విషయంలో వెనక్కి తగ్గకపోతే క్రిమినల్ చర్యలు చేపడతామని హెచ్చరించారు. తిరుమలలో భక్తుల సౌకర్యాలు, టీటీడీ ఆస్తుల వినియోగానికి సంబంధించి నిబంధనలను కచ్చితంగా పాటించాలని ఆయన స్పష్టం చేశారు.

మొత్తంగా తిరుమలలోని కర్ణాటక ఛౌల్ట్రీల కేటాయింపు అంశం ఇప్పుడు రాజకీయంగా చర్చనీయాంశంగా మారింది. ఈ ప్రతిపాదనపై భాను ప్రకాష్ రెడ్డి అభ్యంతరాలు వ్యక్తం చేయడంతో వివాదం మరింత ప్రాధాన్యం సంతరించుకుంది. ఈ వ్యవహారంపై సంబంధిత అధికారులు ఎలాంటి నిర్ణయం తీసుకుంటారన్నది ఆసక్తికరంగా మారింది.