‘జైలర్ 2’పై మొదట్లో ఉన్నంత హైప్ ప్రస్తుతం కనిపించడం లేదనే అభిప్రాయాలు వినిపిస్తున్నప్పటికీ, సినిమా విడుదల దగ్గర పడుతున్న కొద్దీ పరిస్థితులు మారుతున్నాయి. ఇప్పటికే పలు ప్రాంతాల్లో అడ్వాన్స్ బుకింగ్స్ ప్రారంభం కాగా, బుకింగ్స్ ఓపెన్ చేసిన కేంద్రాల్లో మంచి స్పందన కనిపిస్తున్నట్లు ట్రేడ్ వర్గాల సమాచారం. ముఖ్యంగా ప్రధాన నగరాల్లో టికెట్ విక్రయాలు జోరుగా సాగుతున్నట్లు తెలుస్తుంది.

భారీ విజయాన్ని అందుకున్న సినిమాకు సీక్వెల్ కావడంతో ప్రేక్షకుల్లో సహజంగానే ఆసక్తి నెలకొంది. ఇప్పటివరకు విడుదలైన ప్రమోషనల్ కంటెంట్ కూడా సినిమాపై అంచనాలను పెంచే ప్రయత్నం చేసింది. అయితే, విడుదల సమయానికి ఈ హైప్ మరింత పెరుగుతుందా? అనేది ఇప్పుడు ఆసక్తికరంగా మారింది.

మరోవైపు, బుక్‌మైషోలో ప్రధాన కేంద్రాల్లో బుకింగ్స్ ప్రారంభమైన తర్వాత ప్రతి గంటకు సుమారు 35 వేల నుంచి 40 వేల టికెట్లు అమ్ముడవుతున్నట్లు సమాచారం. ఇదే వేగం కొనసాగితే విడుదల సమయానికి బుకింగ్స్ మరింత పెరిగే అవకాశం ఉంది. ముఖ్యంగా ఓవర్సీస్ మార్కెట్‌లో కూడా చివరి నిమిషంలో బుకింగ్స్ పుంజుకుంటే సినిమాకు మంచి ఓపెనింగ్స్ దక్కే అవకాశముంది.

సినిమాకు పాజిటివ్ టాక్ వస్తే మాత్రం రజినీకాంత్ బాక్సాఫీస్ స్టామినా మరోసారి కనిపించే అవకాశం ఉంది. మరి ‘జైలర్ 2’ మొదటి భాగం సృష్టించిన రికార్డులను అధిగమిస్తుందా? లేదా అనేది తెలియాలంటే సినిమా విడుదల వరకు వేచి చూడాల్సిందే.