మ్యాచ్ విషయానికి వస్తే.. టాస్ గెలిచి తొలుత బ్యాటింగ్ చేసిన ఢిల్లీ క్యాపిటల్స్ జట్టును ఆర్సీబీ బౌలర్లు చిగురుటాకులా వణికించారు. కొత్త బంతితో జోష్ హేజిల్‌వుడ్, భువనేశ్వర్ కుమార్ నిప్పులు చెరిగే బంతులతో విరుచుకుపడ్డారు. ఒక దశలో 13 పరుగులకే 6 వికెట్లు కోల్పోయి ఢిల్లీ పీకల్లోతు కష్టాల్లో పడింది. డెబ్యూటెంట్ సాహిల్ పరాఖ్, సమీర్ రిజ్వీ, కెప్టెన్ అక్షర్ పటేల్ డకౌట్లుగా వెనుదిరిగారు. అభిషేక్ పోరెల్ (30), డేవిడ్ మిల్లర్ (19), కైల్ జేమీసన్ (12) కాసేపు పోరాడినా, ఢిల్లీ జట్టు 16.3 ఓవర్లలో కేవలం 75 పరుగులకే కుప్పకూలింది.

76 పరుగుల స్వల్ప లక్ష్యంతో బరిలోకి దిగిన ఆర్సీబీ, కేవలం 6.3 ఓవర్లలోనే ఒక వికెట్ కోల్పోయి లక్ష్యాన్ని ఛేదించింది. ఓపెనర్లు విరాట్ కోహ్లీ, జాకబ్ బెథెల్ (20) మెరుపు ఆరంభాన్ని ఇచ్చారు. వన్ డౌన్‌లో వచ్చిన దేవదత్ పడిక్కల్ (34 నాటౌట్) టాప్ స్కోరర్‌గా నిలవగా, కోహ్లీ 23 పరుగులతో అజేయంగా నిలిచాడు. టి.నటరాజన్ బౌలింగ్‌లో వరుసగా రెండు సిక్సర్లు బాదిన కోహ్లీ, విన్నింగ్ రన్స్ పూర్తి చేసి జట్టుకు 9 వికెట్ల తేడాతో భారీ విజయాన్ని అందించాడు.

ఈ అద్భుత విజయంతో డిఫెండింగ్ ఛాంపియన్ ఆర్సీబీ పాయింట్ల పట్టికలో రెండో స్థానానికి ఎగబాకింది. విరాట్ కోహ్లీ ప్రస్తుత సీజన్‌లో 8 ఇన్నింగ్స్‌లలో 351 పరుగులు పూర్తి చేసుకుని, ఆరెంజ్ క్యాప్ రేసులో నాలుగో స్థానంలో కొనసాగుతున్నాడు. ప్రస్తుతం సన్‌రైజర్స్ హైదరాబాద్ ఆటగాడు అభిషేక్ శర్మ (380 పరుగులు) అగ్రస్థానంలో ఉన్నాడు. ఆర్సీబీ తన తదుపరి మ్యాచ్‌ను మే 30న అహ్మదాబాద్‌లో గుజరాత్ టైటాన్స్‌తో ఆడనుంది.