Last Updated:
రాజస్థాన్ రాయల్స్ 15 ఏళ్ల యువ సంచలనం వైభవ్ సూర్యవంశీ ఐపీఎల్లో అద్భుతం సృష్టించాడు. సన్రైజర్స్ హైదరాబాద్పై చెలరేగుతూ కేవలం 15 బంతుల్లో హాఫ్ సెంచరీ, 36 బంతుల్లోనే 2వ ఐపీఎల్ సెంచరీ పూర్తి చేసి సరికొత్త రికార్డు సగర్వంగా నమోదు చేశాడు.
రాజస్థాన్ రాయల్స్ యువ సంచలనం, కేవలం పదిహేనేళ్ల వయసున్న వైభవ్ సూర్యవంశీ ఐపీఎల్ చరిత్రలో మరోసారి ఊహించని అద్భుతం సృష్టించాడు. జైపూర్లోని సవాయ్ మాన్సింగ్ స్టేడియం వేదికగా సన్రైజర్స్ హైదరాబాద్ బౌలర్లను ముప్పుతిప్పలు పెడుతూ ఆకాశమే హద్దుగా చెలరేగిపోయాడు. శనివారం రాత్రి జరిగిన ఈ ఉత్కంఠభరిత మ్యాచ్లో తన విశ్వరూపం ప్రదర్శిస్తూ బౌండరీల వర్షం కురిపించాడు. ఈ సీజన్లో సన్రైజర్స్పై గతంలో ఎదురైన ఘోర వైఫల్యానికి వడ్డీతో సహా బదులు తీర్చుకుంటూ ఏకంగా సెంచరీతో కదం తొక్కాడు. కేవలం పదిహేను బంతుల్లోనే అర్ధ శతకం పూర్తి చేసుకున్న ఈ టీనేజ్ స్టార్, ఆ తర్వాత మరింత వేగం పెంచి కేవలం ముప్పై ఆరు బంతుల్లోనే ఐపీఎల్ కెరీర్లో తన రెండో శతకాన్ని సగర్వంగా నమోదు చేశాడు.
15వ ఏటే ప్రపంచ క్రికెట్ రికార్డులను తిరగరాస్తూ, 40 బంతుల్లోపు రెండుసార్లు సెంచరీ సాధించిన ఏకైక బ్యాటర్గా నయా చరిత్ర సృష్టించాడు. బౌలర్ ఎవరైనా సరే లెక్కచేయకుండా మైదానం నలువైపులా భారీ సిక్సర్లు, ఫోర్లు బాదుతూ ప్రత్యర్థి జట్లకు సింహస్వప్నంగా మారాడు.
| Player | Balls | Match | Venue | Date |
|---|---|---|---|---|
| Chris Gayle | 30 | Royal Challengers Bangalore v Pune Warriors | Bangalore | 23-Apr-13 |
| Vaibhav Sooryavanshi | 35 | Rajasthan Royals v Gujarat Titans | Jaipur | 28-Apr-25 |
| Vaibhav Sooryavanshi | 36 | Rajasthan Royals v Sunrisers Hyderabad | Jaipur | 25-Apr-26 |
| Yusuf Pathan | 37 | Rajasthan Royals v Mumbai Indians | Mumbai | 13-Mar-10 |
| Heinrich Klaasen | 37 | Sunrisers Hyderabad v Kolkata Knight Riders | Delhi | 25-May-25 |
సన్రైజర్స్ హైదరాబాద్ టాస్ గెలిచి బౌలింగ్ ఎంచుకోగా, సూర్యవంశీ ఆరంభం నుంచే శివమెత్తాడు. తనను గతంలో డకౌట్ చేసిన ప్రఫుల్ హింగే బౌలింగ్లో తొలి ఓవర్లోనే వరుస సిక్సర్లతో 24 పరుగులు పిండుకున్నాడు. అనంతరం 13వ ఓవర్లో షకీబ్ హుస్సేన్ బౌలింగ్లో వరుసగా 6, 4, 6 బాది సగర్వంగా సెంచరీ మార్క్ చేరుకుని తర్వాతి బంతికే అవుటయ్యాడు.
ఈ చారిత్రక మ్యాచ్లో కేవలం 37 బంతులు ఎదుర్కొన్న వైభవ్ 278.38 స్ట్రైక్ రేట్తో 103 పరుగులు చేశాడు. ఇందులో 12 భారీ సిక్సర్లు, 5 ఫోర్లు ఉన్నాయి. దీంతో ఐపీఎల్లో ఒక ఇన్నింగ్స్లో అత్యధిక సిక్సర్లు బాదిన తొలి భారతీయ బ్యాటర్గా ఈ యువ ఆటగాడు సంచలన రికార్డు సృష్టించాడు.
ఐపీఎల్ చరిత్రలో వేగవంతమైన సెంచరీల జాబితాలో గేల్ (30 బంతులు) అగ్రస్థానంలో కొనసాగుతున్నాడు. గత సీజన్లో 35 బంతుల్లో శతకం సాధించిన సూర్యవంశీ ఇప్పుడు 36 బంతుల్లో మరోసారి ఈ అద్భుతమైన ఘనత సాధించి ఆ జాబితాలో రెండు, మూడు స్థానాలను తన పేరిటే పదిలం చేసుకోవడం విశేషం. కెప్టెన్ ప్యాట్ కమిన్స్ తిరిగి జట్టులోకి వచ్చినా సన్రైజర్స్కు ఈ పరాభవం తప్పలేదు.
Click here to add News18 as your preferred news source on Google. లేటెస్ట్ క్రికెట్ అప్డేట్స్, మ్యాచ్ అప్డేట్స్, మ్యాచ్ రివ్యూస్, లైవ్ స్కోర్, మ్యాచ్ అనాలిసిస్, ప్లేయర్ ప్రొఫైల్స్, ఇతర క్రీడలకు సంబంధించిన స్టోరీలను న్యూస్18 తెలుగు స్పోర్ట్స్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి
Hyderabad,Telangana
Apr 25, 2026 10:29 PM IST
