ఓవర్సీస్ మార్కెట్‌లో ‘పెద్ది’ చిత్రానికి సంబంధించిన అడ్వాన్స్ బుకింగ్స్ ఊహించని స్థాయిలో జరుగుతున్నాయి. టికెట్లు హాట్ కేకుల్లా అమ్ముడవుతుండటంతో, ఈ చిత్రం రిలీజ్‌కు ముందే నార్త్ అమెరికాలో వన్ మిలియన్ డాలర్ల (1 Million) గ్రాస్ మార్క్‌ను దాటేసి సరికొత్త రికార్డు సృష్టించింది. రాజమౌళి విజువల్ వండర్ ‘ఆర్‌ఆర్‌ఆర్‌’ తర్వాత, కేవలం ప్రీమియర్ షోల బుకింగ్స్ ద్వారానే రామ్ చరణ్‌కు ఈ స్థాయి వన్ మిలియన్ మార్క్ అందుకోవడం ఇదే తొలిసారి కావడం విశేషం. చరణ్ గ్లోబల్ క్రేజ్‌కు ఈ వసూళ్లే నిదర్శనమని ట్రేడ్ విశ్లేషకులు చెబుతున్నారు.

సినిమా విడుదల సమయం దగ్గర పడటంతో చిత్రబృందం ప్రచార కార్యక్రమాల్లో వేగం పెంచింది. తాజాగా ఓ ఇంటర్వ్యూలో దర్శకుడు బుచ్చిబాబు సానా మాట్లాడుతూ రామ్ చరణ్ పడ్డ కష్టాన్ని కొనియాడారు. “పెద్ది పాత్ర అందరి గుండెల్లో ఎప్పటికీ నిలిచిపోతుంది. అందుకు కారణం చరణ్ గారు ఆ పాత్రలో పరకాయ ప్రవేశం చేయడమే. ఈ సినిమా కోసం ఆయన ఎంతో శ్రమించారు. ముఖ్యంగా కుస్తీ (రెజ్లింగ్) సన్నివేశాల చిత్రీకరణలో చరణ్‌కు తీవ్రమైన దెబ్బలు తగిలాయి. ఒక దశలో కంటికి కూడా గాయమైంది. ఆ సమయంలో మెగాస్టార్ చిరంజీవి గారు ఏమంటారో అని నాకు చాలా భయమేసింది. కానీ చరణ్ గారు ఆ నొప్పినైనా లెక్కచేయకుండా, షూటింగ్‌ను ఆపకుండా పూర్తి చేశారు” అని బుచ్చిబాబు ఎమోషనల్ అయ్యారు.