పోలీసుల వివరాల ప్రకారం, తిరుమల ట్రాఫిక్ పోలీస్ స్టేషన్‌లో విధులు నిర్వహిస్తున్న హోంగార్డు ఈ. నరేష్‌పై ఓ మహిళ ఇచ్చిన ఫిర్యాదు ఆధారంగా తిరుమల–II టౌన్ పోలీస్ స్టేషన్‌లో కేసు నమోదైంది. ఈ వ్యవహారం జిల్లా ఎస్పీ దృష్టికి చేరడంతో కేసుకు సంబంధించిన వివరాలను సమగ్రంగా పరిశీలించారు. అనంతరం శాఖాపరమైన విచారణ పూర్తయ్యే వరకు నిబంధనల ప్రకారం హోంగార్డును సస్పెండ్ చేయాలని ఆదేశించారు. ప్రస్తుతం క్రిమినల్ కేసు దర్యాప్తుతో పాటు శాఖాపరమైన విచారణ కూడా సమాంతరంగా కొనసాగుతున్నట్లు అధికారులు తెలిపారు.

దర్యాప్తులో వెలుగులోకి వచ్చే ప్రతి అంశాన్ని చట్టపరమైన ప్రమాణాల ప్రకారం పరిశీలిస్తామని పోలీసులు స్పష్టం చేశారు. సాక్ష్యాధారాలు, వాంగ్మూలాలు, ఇతర సంబంధిత వివరాలను సేకరించి నిష్పక్షపాతంగా విచారణ చేపడుతున్నామని పేర్కొన్నారు. దర్యాప్తు పూర్తయ్యాక చట్టం ప్రకారం తదుపరి చర్యలు తీసుకుంటామని వెల్లడించారు.

ఈ సందర్భంగా జిల్లా ఎస్పీ ఎల్. సుబ్బరాయుడు మాట్లాడుతూ.. మహిళలకు సంబంధించిన ప్రతి ఫిర్యాదును అత్యంత బాధ్యతతో స్వీకరిస్తామని తెలిపారు. ఎలాంటి ఒత్తిళ్లు, ప్రభావాలకు తావులేకుండా ప్రతి కేసును పారదర్శకంగా విచారించి, నిబంధనల ప్రకారం చర్యలు తీసుకోవడం తిరుపతి జిల్లా పోలీసు శాఖ విధానమని స్పష్టం చేశారు. మహిళల భద్రత, ప్రజల విశ్వాసం తమకు అత్యంత ప్రాధాన్యమని ఆయన పేర్కొన్నారు.

పోలీసు శాఖలో పనిచేసే ప్రతి అధికారి, సిబ్బంది, హోంగార్డు ప్రజల విశ్వాసాన్ని నిలబెట్టేలా క్రమశిక్షణ, నిజాయితీ, వృత్తి నైతికతతో వ్యవహరించాలని ఎస్పీ సూచించారు. మహిళల పట్ల గౌరవంగా ప్రవర్తించడం ప్రతి పోలీసు సిబ్బంది బాధ్యత అని పేర్కొన్నారు. శాఖ ప్రతిష్ఠకు భంగం కలిగించే విధంగా ఎవరైనా వ్యవహరిస్తే వారి హోదాతో సంబంధం లేకుండా చట్టపరంగానూ, శాఖాపరంగానూ కఠిన చర్యలు తప్పవని ఆయన హెచ్చరించారు. ప్రజల నుంచి వచ్చే ప్రతి ఫిర్యాదుపై వేగంగా స్పందించి న్యాయం చేయడం పోలీసు శాఖ ప్రధాన బాధ్యతగా కొనసాగుతుందని స్పష్టం చేశారు.