ఏటీఎం కేంద్రాల వద్ద ప్రజలను మోసం చేస్తున్న అంతర్రాష్ట్ర నేరగాడు ఇంటిపల్లి రామారావు (అలియాస్ శ్రీరామ్)ను సుల్తాన్ బజార్ పోలీసులు అరెస్ట్ చేశారు. ఖైరతాబాద్ జోన్ డీసీపీ కె. శిల్పవల్లి తెలిపిన వివరాల ప్రకారం.. నిందితుడు ఏటీఎంల వద్ద నగదు డిపాజిట్ చేయడానికి వచ్చే వారిని సహాయం చేస్తానని నమ్మించేవాడు. తన ఫోన్ నుంచి నెఫ్ట్ (NEFT) ద్వారా డబ్బులు పంపిస్తున్నట్లు నకిలీ మెసేజ్లు లేదా స్క్రీన్షాట్లు చూపించి, వారి దగ్గర ఉన్న నగదును తీసుకుని పరారయ్యేవాడు. ఇలా సుల్తాన్ బజార్లో ఒక మహిళను నమ్మించి రూ. 1 లక్ష కాజేశాడు. నిందితుడి బ్యాంకు ఖాతాలోని రూ. 2.40 లక్షలను పోలీసులు ఫ్రీజ్ చేయడమే కాకుండా, రెండు మొబైల్ ఫోన్లను స్వాధీనం చేసుకున్నారు. రామారావుపై 2018 నుంచి 2025 వరకు రెండు తెలుగు రాష్ట్రాల్లో సుమారు 73 కేసులు నమోదై ఉన్నాయి. సీసీటీవీ దృశ్యాల ఆధారంగా స్పెషల్ టీమ్ అతడిని కోఠి సమీపంలో పట్టుకుంది.



Source link