ఐపీఎల్ టోర్నీలలో కోల్‌కతా, ఢిల్లీ, పంజాబ్ జట్లను విజయవంతంగా నడిపించిన అనుభవం శ్రేయస్ అయ్యర్‌కు ఉంది. గత రెండు ఐపీఎల్ సీజన్లలో భారీ స్ట్రైక్ రేట్‌తో పరుగులు సాధించిన ఆయన, 2023 డిసెంబర్ తర్వాత మళ్లీ టీ20 అంతర్జాతీయ మ్యాచ్‌ల్లో అడుగుపెడుతున్నారు. మరోవైపు సూర్యకుమార్ యాదవ్ ప్రపంచకప్‌తో పాటు ఇటీవల ముగిసిన ఐపీఎల్‌లోనూ ఆశించిన స్థాయిలో రాణించలేకపోయారు. 2028 లాస్ ఏంజిల్స్ ఒలింపిక్స్, రాబోయే ప్రపంచకప్‌లను దృష్టిలో ఉంచుకుని సెలెక్టర్లు ఈ కఠిన నిర్ణయం తీసుకున్నారు. గత ఏడాది ఛాంపియన్స్ ట్రోఫీ గెలిచిన తర్వాత రోహిత్ శర్మను వన్డే కెప్టెన్సీ నుంచి తప్పించిన బీసీసీఐ, ఇప్పుడు టీ20 ఫార్మాట్‌లోనూ అదే తరహాలో యువతకు పెద్దపీట వేస్తూ ముందడుగు వేసింది.

ఈ పర్యటనల షెడ్యూల్ ప్రకారం జూన్ 26, 28 తేదీల్లో ఐర్లాండ్‌తో బెల్ఫాస్ట్‌లో రెండు టీ20 మ్యాచ్‌లు జరుగుతాయి. ఆ తర్వాత జూలై 1 నుండి 11 వరకు ఇంగ్లాండ్‌తో ఐదు మ్యాచ్‌ల సిరీస్ సాగనుంది. ఈ రెండు జట్లలోనూ అభిషేక్ శర్మ, నితీష్ కుమార్ రెడ్డి, శివం దూబే, ఇషాన్ కిషన్, సంజూ శాంసన్ వంటి పవర్‌ఫుల్ హిట్టర్లకు చోటు దక్కింది. బౌలింగ్ విభాగంలో అర్ష్‌దీప్ సింగ్, మహమ్మద్ సిరాజ్, రవి బిష్ణోయ్, వరుణ్ చక్రవర్తి తమ స్థానాలను నిలబెట్టుకున్నారు. ప్రపంచకప్ విజయం తర్వాత భారత జట్టు ఆడుతున్న మొదటి టీ20 సిరీస్ ఇదే కావడం వల్ల, శ్రేయస్ అయ్యర్ సరికొత్త నాయకత్వంలో యువ భారత్ ఎలా రాణిస్తుందనేది ఆసక్తికరంగా మారింది.