మధ్యప్రాచ్య (Middle East) సంక్షోభంపై ట్రంప్ యంత్రాంగం లోపల జరుగుతున్న అంతర్గత చర్చలు, వారు తీసుకోబోయే నిర్ణయాలను ముందే పసిగట్టేందుకు.. అమెరికా ఉన్నతాధికారులను ఇజ్రాయెల్ టార్గెట్ చేసి నిఘా పెడుతోందనే అనుమానాలు పెంటగాన్‌లో బలంగా వ్యక్తమవుతున్నాయి. డీఐఏ (DIA) రూపొందించిన 7 పేజీల రహస్య నివేదిక ప్రకారం.. మానవ వనరుల ద్వారా నిఘా పెట్టడం (Human Intelligence), సాంకేతిక సమాచారాన్ని దొంగిలించడం (Technical Collection) వంటి అంశాలలో ఇజ్రాయెల్ సామర్థ్యం ఇప్పుడు అమెరికాకు ఒక సవాల్‌గా, “క్రిటికల్ స్థాయి”కి చేరిందని పేర్కొంది.

అయితే ఈ ఆరోపణలను ఇజ్రాయెల్ తీవ్రంగా ఖండించింది. వాషింగ్టన్‌లోని ఇజ్రాయెల్ రాయబార కార్యాలయ ప్రతినిధి స్పందిస్తూ.. ఈ నివేదిక పూర్తిగా అవాస్తవమని కొట్టిపారేశారు. “ఇజ్రాయెల్ అమెరికా సంస్థలపై గానీ, అమెరికా ప్రభుత్వ అధికారులపై గానీ ఎలాంటి నిఘా పెట్టదు. మా నిఘా వ్యవస్థలన్నీ శత్రు దేశాలపైనే ఉంటాయి తప్ప మిత్రదేశాలపై కాదు” అని స్పష్టం చేశారు. మరోవైపు ఈ నివేదికపై స్పందించేందుకు పెంటగాన్ నిరాకరించగా, వైట్ హౌస్ అధికారి ఒకరు కూడా ఈ కథనాన్ని తోసిపుచ్చారు.

ఇరాన్ మరియు లెబనాన్ యుద్ధ వ్యూహాలపై అమెరికా అధ్యక్షుడు డొనాల్డ్ ట్రంప్, ఇజ్రాయెల్ ప్రధాని బెంజమిన్ నెతన్యాహు మధ్య తీవ్ర విభేదాలు వచ్చినట్లు తెలుస్తోంది. ఈ విషయమై ఈ వారం ఇద్దరు నేతల మధ్య జరిగిన ఫోన్ సంభాషణ తీవ్ర ఉద్రిక్తతకు దారితీసిందని, ఆ సమయంలో తాను నెతన్యాహును ‘క్రేజీ’ (పిచ్చివాడు) అని అన్నట్లు ట్రంప్ స్వయంగా అంగీకరించారు.

ఇజ్రాయెల్ పర్యటనకు వెళ్లే అమెరికా ఉన్నతాధికారులు ముందే అదనపు భద్రతా జాగ్రత్తలు తీసుకుంటున్నట్లు అధికారులు తెలిపారు. ఇజ్రాయెల్ చాలా దూకుడుగా సమాచారాన్ని సేకరిస్తుందని, అందుకే అక్కడికి వెళ్లే ప్రతినిధులు ప్రత్యేకమైన బర్నర్ ఫోన్లు, ల్యాప్‌టాప్‌లను ఉపయోగిస్తారని సమాచారం. హోటల్ గదుల్లో మాట్లాడేటప్పుడు కూడా వారు అత్యంత జాగ్రత్తగా వ్యవహరిస్తున్నారు.