ఈ చిత్ర ప్రాజెక్ట్, ప్రమోషనల్ మెటీరియల్స్ తన పబ్లిక్ ఇమేజ్‌ను దెబ్బతీసేలా ఉన్నాయని పిటిషన్‌లో పేర్కొన్నారు. ఈ సినిమా కథాంశం మొత్తం సల్మాన్ ఖాన్‌కు సంబంధించిన ప్రసిద్ధ ‘కృష్ణజింక కేసు’ (Blackbuck Case) ఆధారంగా రూపొందించబడిందని, దీనివల్ల ప్రస్తుతం కోర్టులో పెండింగ్‌లో ఉన్న న్యాయపరమైన విచారణల ప్రక్రియ ప్రభావితమయ్యే ప్రమాదం ఉందని సల్మాన్ తరపు న్యాయవాదులు వాదించారు.

అనుమతి లేకుండా ఒకరి వ్యక్తిగత జీవిత విశేషాలను సినిమాగా మలచడం వారి హక్కులకు భంగం కలిగించడమేనని పిటిషన్‌లో స్పష్టం చేశారు. ఈ వివాదాస్పద చిత్రంపై తక్షణమే స్టే విధించాలని సల్మాన్ ఖాన్ ఢిల్లీ హైకోర్టును గట్టిగా అభ్యర్థించారు. ఈ పరిణామం ఇప్పుడు చిత్ర పరిశ్రమలో తీవ్ర సంచలనం సృష్టిస్తోంది.

గత నెలలో ఈ సినిమా ఫస్ట్ లుక్ పోస్టర్‌ను రిలీజ్ చేసిన అనంతరం దీనిపై మేకర్స్ మాట్లాడుతూ.. 1998లో జోధ్‌పూర్‌లోని కకానీ గ్రామంలో జరిగిన కృష్ణ జింక వేట కేసు, నడిచిన కోర్టు డ్రామా, అదేవిధంగా సల్మాన్ ఖాన్‌కు, లారెన్స్ బిష్ణోయ్‌కు మధ్య నెలకొన్న తీవ్రమైన వైరాన్ని ఈ సినిమాలో చూపించబోతున్నాం అని తెలిపారు.