సామాజిక అంశాలు, నిజజీవిత కథలను తెరపై ఆవిష్కరించడంలో ప్రత్యేక గుర్తింపు పొందిన దర్శకురాలు, రచయిత్రి స్వాతి చక్రవర్తి భట్కల్ ఈ డాక్యుమెంటరీకి దర్శకత్వం వహించనున్నారు. ఈ చిత్రం ద్వారా ఒడిశాలోని ఓ చిన్న గ్రామం నుంచి భారతదేశ తొలి గిరిజన రాష్ట్రపతిగా, రెండో మహిళా రాష్ట్రపతిగా ఎదిగిన ద్రౌపది ముర్ము అద్భుత ప్రయాణాన్ని చూపించనున్నారు.

ఆమె జీవితంలో ఎదుర్కొన్న ఎన్నో కష్టాలు, వ్యక్తిగత విషాదాలు, ఎదురుదెబ్బలు, ప్రజాసేవలో గడిపిన సంవత్సరాలు, వాటన్నింటినీ అధిగమించి రాష్ట్రపతి భవన్ వరకు చేరుకున్న ధైర్యం, పట్టుదలను ఈ డాక్యుమెంటరీలో ప్రతిబింబించనున్నారు. కేవలం రాజకీయ జీవితాన్నే కాకుండా, ఆమె వ్యక్తిత్వాన్ని తీర్చిదిద్దిన కీలక ఘట్టాలను ఇందులో చూపించబోతున్నారు.

సమాజంలోని వివిధ వర్గాలకు స్ఫూర్తిగా నిలిచిన ద్రౌపది ముర్ము జీవితాన్ని మరింత దగ్గరగా పరిచయం చేయడమే ఈ చిత్ర లక్ష్యంగా కనిపిస్తోంది. ఆమె ఎన్నిక గిరిజన వర్గాలకు, మహిళలకు, సామాజికంగా వెనుకబడిన వర్గాలకు ఒక చారిత్రాత్మక మైలురాయిగా నిలిచిందనే అంశాన్ని కూడా డాక్యుమెంటరీలో ప్రస్తావించనున్నారు.

సామాజిక స్పృహ కలిగిన కథలను నిర్మించడంలో ఆమిర్ ఖాన్ ప్రొడక్షన్స్‌కు ప్రత్యేక గుర్తింపు ఉంది. గతంలో ఆమిర్ ఖాన్, కిరణ్ రావు నిర్మించిన, స్వాతి చక్రవర్తి భట్కల్ దర్శకత్వం వహించిన ‘రుబారు రోష్ని’ డాక్యుమెంటరీ విశేష ప్రశంసలు అందుకుంది. హింస, క్షమాభిక్ష, మానవీయ విలువలు వంటి అంశాలను సున్నితంగా ఆవిష్కరించిన ఆ డాక్యుమెంటరీ విమర్శకుల ప్రశంసలు పొందింది.

ఇప్పుడు ద్రౌపది ముర్ము జీవిత కథను అదే స్థాయిలో నిజాయితీతో తెరకెక్కించేందుకు ప్రయత్నాలు జరుగుతున్నాయి. సమాచారం ప్రకారం, ఒడిశాలోని ఆమె స్వగ్రామంలో ఇప్పటికే కొన్ని కీలక సన్నివేశాలను చిత్రీకరించారు. ఆమె చిన్ననాటి నుంచి వివిధ దశలను చూపించేందుకు స్థానిక కళాకారులను ఎంపిక చేశారు. పాత ఫుటేజీలు, నిజమైన ప్రదేశాలు, నాటకీయ పునర్నిర్మాణాలను కలిపి ఈ డాక్యుమెంటరీని రూపొందించనున్నారు. ఒక సాధారణ కుటుంబం నుంచి దేశ అత్యున్నత రాజ్యాంగ పదవిని అధిరోహించిన ద్రౌపది ముర్ము జీవితం ఎందరో మహిళలకు, యువతకు, గిరిజన సమాజానికి ప్రేరణగా నిలిచింది. ఇప్పుడు ఆమె జీవన ప్రయాణం వెండితెరపై ఆవిష్కృతం కానుండటం దేశవ్యాప్తంగా ఆసక్తిని రేకెత్తిస్తోంది.