ఈ వ్యూహానికి తుది రూపు ఇచ్చేందుకు పాకిస్తాన్ ప్రధాని షెహబాజ్ షరీఫ్, ఫీల్డ్ మార్షల్ అసిమ్ మునీర్ అధ్యక్షతన ఇస్లామాబాద్‌లో మంగళవారం ఒక ఉన్నత స్థాయి సివిల్-మిలిటరీ సమావేశం షెడ్యూల్ అయింది. లభించే ప్రతి అంతర్జాతీయ వేదికపైనా ఈ సింధు జలాల వివాదాన్ని తీవ్రతరం చేయడమే ఈ సమావేశం ముఖ్య ఉద్దేశం.

ఈ సమావేశానికి ముందే పాక్ నేతలు తమ మాటల పదును పెంచారు. సింధు జలాల ఒప్పందాన్ని పునరుద్ధరించడం కోసం పాకిస్తాన్ “పోరాడుతుందని” అక్కడి ఫెడరల్ మంత్రులు ప్రకటిస్తున్నారు. “మా నీటిని తాకే చేతులను నరికేస్తాం” అని ఒక మంత్రి హెచ్చరించగా, భారత ప్రధాని నరేంద్ర మోదీ “జల ఉగ్రవాదానికి” పాల్పడుతున్నారని సీనియర్ నాయకులు ఆరోపిస్తున్నారు. దేశ నీటి భద్రతకు వచ్చే ఎలాంటి ముప్పుకైనా పూర్తిస్థాయిలో సమాధానం ఇచ్చేందుకు పాక్ సాయుధ దళాలు సిద్ధంగా ఉన్నాయని ప్రగల్భాలు పలుకుతున్నారు.

అయితే, ప్రపంచవ్యాప్తంగా ఒప్పందాలు లేకపోయినా నదీ జలాలు ప్రవహిస్తాయని, నదీ ప్రవాహాన్ని అడ్డుకునే హక్కు భారత్‌కు లేదని పాక్ వాదిస్తోంది. మరోవైపు, ఆ దేశ వాతావరణ శాఖ మంత్రి డాక్టర్ ముసాదిక్ మాలిక్ మాత్రం.. పాకిస్తాన్‌లోకి వచ్చే నదీ ప్రవాహాలను విచక్షణారహితంగా అడ్డుకునే మౌలిక సదుపాయాల సామర్థ్యం (ఇన్‌ఫ్రాస్ట్రక్చర్) ప్రస్తుతం భారత్‌కు లేదని పేర్కొన్నారు. నిధుల కొరత కారణంగా పాక్‌కు చెందిన డయామర్-భాషా, దాసు డ్యామ్ ప్రాజెక్టులు కుంటుపడినప్పటికీ, ఈ జల వివాదాన్ని అంతర్జాతీయ జోక్యం అవసరమైన ప్రపంచ సమస్యగా చూపించడానికే ఇస్లామాబాద్ ప్రయత్నిస్తోంది.

పాకిస్తాన్‌లో రోజురోజుకూ దిగజారుతున్న ఆర్థిక వ్యవస్థ, రాజకీయ అస్థిరత, వ్యూహాత్మక పరాజయాలు, ముఖ్యంగా పీఓకేలో ప్రభుత్వంపై ప్రజల్లో పెరుగుతున్న తీవ్ర ఆగ్రహాన్ని పక్కదారి పట్టించేందుకే ఇస్లామాబాద్ ఈ డ్రామా ఆడుతోంది. “జల ఉగ్రవాదం” వంటి ఎమోషనల్ పదాలను వాడుతూ, అతి-జాతీయవాద భావజాలాన్ని రేకెత్తించడం ద్వారా.. దేశంలోని వనరుల దుర్వినియోగం, నాయకత్వంపై ప్రజల్లో నశించిన నమ్మకం వంటి అంతర్గత సమస్యల నుంచి ప్రజల మైండ్‌ను డైవర్ట్ చేయడమే పాక్ పాలకుల అసలు ప్లాన్ అని ఇంటెలిజెన్స్ వర్గాలు స్పష్టం చేశాయి.