భాండూప్ పరిధిలోని సోనాపూర్ ప్రాంతంలో ఒక నిర్మాణ స్థలం సమీపంలో నిరంతర వర్షాల కారణంగా రోడ్డు ఒక్కసారిగా కుంగిపోయింది (Road Cave-in). దాంతో అక్కడ నిలిపి ఉంచిన ఒక వాహనం ఆ గుంతలోకి మునిగిపోయింది. అయితే, ఈ ప్రమాదంలో ఎలాంటి ప్రాణనష్టం జరగలేదని అధికారులు ధృవీకరించారు. ముంబైతో పాటు పక్కనే ఉన్న థానే, పాల్ఘర్ జిల్లాల్లో కూడా లోతట్టు ప్రాంతాలు జలమయమయ్యాయి. పలుచోట్ల చెట్లు విరిగిపడటంతో రవాణా వ్యవస్థకు తీవ్ర అంతరాయం కలిగింది.

ముంబై మెట్రోపాలిటన్ రీజియన్‌లో రాబోయే గంటల్లో అత్యంత భారీ వర్షాలు కురిసే అవకాశం ఉందని భారత వాతావరణ శాఖ (IMD) ‘రెడ్ అలర్ట్’ జారీ చేసింది. ముందస్తు జాగ్రత్త చర్యగా ముంబైలోని పాఠశాలలు, కళాశాలలకు శనివారం మధ్యాహ్నం సెషన్ నుండి సెలవు ప్రకటించారు. లోకల్ రైళ్ల రాకపోకలకు కూడా స్వల్ప అంతరాయం కలిగింది. కొన్ని ప్రాంతాలలో ఇళ్లు కూలిపోయిన ఘటనలు కూడా నమోదయ్యాయి.

రాష్ట్రంలో నెలకొన్న పరిస్థితులపై ముఖ్యమంత్రి దేవేంద్ర ఫడ్నవీస్ స్పందించారు. ముంబై మెట్రోపాలిటన్ రీజియన్‌తో పాటు పుణే, నాసిక్ బెల్ట్‌లలో ఉన్న ప్రజలు అత్యవసరమైతే తప్ప ప్రయాణాలు చేయవద్దని కోరారు. జూలై 6 వరకు భారీ వర్షాలు మరియు పిడుగులతో కూడిన పవనాలు వీచే అవకాశం ఉన్నందున, ప్రజలందరూ ప్రభుత్వ అధికారిక సూచనలను పాటించాలని సీఎం విజ్ఞప్తి చేశారు.