ఈ వివాదంపై బండ్ల గణేష్ సోషల్ మీడియా (ఎక్స్) వేదికగా ఒక సుదీర్ఘమైన పోస్ట్ ద్వారా తన ఆవేదనను వ్యక్తం చేశారు. బ్యాంక్ అధికారులు కుమ్మక్కై, లోపాయికారీ ఒప్పందాలతో తన ఆస్తిని అత్యంత తక్కువ ధరకు అమ్మివేశారని ఆయన ఆరోపించారు. జూబ్లీహిల్స్ లాంటి ప్రైమ్ ఏరియాలో స్థిరాస్తికి మార్కెట్లో కోట్లలో డిమాండ్ ఉంటుంది. అలాంటి ఆస్తిని వాస్తవ మార్కెట్ ధర కంటే చాలా తక్కువ రేటుకు బినామీలకు లేదా తమకు కావాల్సిన వారికి కట్టబెట్టేలా బ్యాంక్ అధికారులు వ్యవహరించారని ఆయన మండిపడ్డారు.

బండ్ల గణేష్ కుటుంబం తీసుకున్న రుణాలను వసూలు చేసే ప్రక్రియలో భాగంగా యూనియన్ బ్యాంక్ ఆఫ్ ఇండియా ఈ ఆస్తిని సీజ్ చేసి వేలం వేసింది. ఈ అన్యాయాన్ని ప్రశ్నిస్తూ బండ్ల గణేష్ 2022లోనే న్యాయస్థానాన్ని ఆశ్రయించారు. తొలుత డెట్ రికవరీ ట్రైబ్యునల్ (DRT) విచారణ జరిపి, బ్యాంక్ వేలం ప్రక్రియలో లోపాలు ఉన్నాయని గుర్తించి బండ్ల గణేష్‌కు అనుకూలంగా తీర్పునిచ్చింది. ఆ ఆస్తి వేలాన్ని రద్దు చేయడంతో పాటు, విక్రయం ద్వారా వచ్చిన సొమ్మును కొనుగోలుదారులకు తిరిగి ఇచ్చేయాలని బ్యాంకును ఆదేశించింది.

హైకోర్టు తీర్పు తనకు వ్యతిరేకంగా వచ్చినప్పటికీ, బండ్ల గణేష్ ఏమాత్రం వెనక్కి తగ్గడం లేదు. “నాకు భారత న్యాయవ్యవస్థపై పూర్తి నమ్మకం ఉంది. నా ఆస్తి హక్కుల కోసం, నాకు జరిగిన అన్యాయంపై పోరాడేందుకు త్వరలోనే దేశ అత్యున్నత న్యాయస్థానం సుప్రీంకోర్టును ఆశ్రయిస్తాను” అని ఆయన స్పష్టం చేశారు. ఒక సామాన్యుడిలాగే తన హక్కుల కోసం చివరి వరకు పోరాడుతానని ఆయన పేర్కొన్నారు. మరి సుప్రీంకోర్టులో ఈ వివాదం ఎలాంటి మలుపు తిరుగుతుందో వేచి చూడాలి.