న్యూఢిల్లీలో తన భర్త, ఐదేళ్ల కుమార్తె, అత్తగారితో కలిసి నివసిస్తున్న కనికా అరోరా పేరు మీద జూన్ 30న కొనుగోలు చేసిన టికెట్ నంబర్ ‘476107’కు ఈ భారీ జాక్‌పాట్ తగిలింది. కనికా భర్త గత కొన్ని సంవత్సరాల క్రితం యూట్యూబ్, సోషల్ మీడియా ద్వారా ఈ బిగ్ టికెట్ లాటరీ గురించి తెలుసుకున్నారు. అప్పటి నుండి వారు ప్రతి నెలా టికెట్లు కొనుగోలు చేస్తూనే ఉన్నారు. అయితే, మొదట్లో భర్త తన పేరు మీదే టికెట్లు కొనేవారని, కానీ ఇటీవల తన భార్య కనిక పేరు మీద టికెట్లు తీసుకోవడం ప్రారంభించారని, అదే తమ అదృష్టాన్ని మార్చేసిందని ఆయన తెలిపారు.

లాటరీ నిర్వాహకుల నుండి గెలుపు సమాచారం అందుకోగానే మొదట నమ్మలేకపోయానని కనిక అన్నారు. “ఆ ఫోన్ కాల్ రాగానే నేను పూర్తిగా ఆశ్చర్యపోయాను, నోట మాట రాలేదు. కానీ నిజమేనని తెలిశాక నా భర్త, నేను అమితానందంలో మునిగిపోయాము” అని ఆమె మీడియాకు వివరించారు.

ఇంతటి భారీ మొత్తాన్ని ఏం చేయబోతున్నారనే ప్రశ్నకు కనిక సమాధానమిస్తూ, తమ కుటుంబానికి ఒక సొంత ఇల్లు కొనడమే తమ మొదటి ప్రాధాన్యత అని చెప్పారు. అలాగే తమ చిన్నారి కుమార్తెకు ఇచ్చిన మాట ప్రకారం ఆమెను ‘డిస్నీల్యాండ్’కు తీసుకెళ్తామని ఆనందంగా తెలిపారు. మిగిలిన మొత్తాన్ని కుమార్తె ఉన్నత చదువుల కోసం, కుటుంబ భవిష్యత్తు కోసం పొదుపు, పెట్టుబడులుగా మారుస్తామని వెల్లడించారు.

“ఇది పూర్తిగా అదృష్టం, మన ఓపికపై ఆధారపడి ఉంటుంది. మనపై, దేవునిపై నమ్మకం ఉంచితే ఎప్పటికైనా మంచి జరుగుతుంది” అని కనిక పేర్కొన్నారు. ఇదే డ్రాలో భారతదేశం, బంగ్లాదేశ్‌లకు చెందిన మరో ఐదుగురు తలా 1 మిలియన్ దిర్హామ్‌ల (సుమారు రూ. 2.6 కోట్లు) ఓదార్పు బహుమతులు గెలుచుకోగా, దుబాయ్‌లో నివసిస్తున్న మరో భారతీయ మహిళ ట్వింకిల్ ఆల్ఫిన్ సరికొత్త BMW X6 విలాసవంతమైన కారును గెలుచుకున్నారు.