నాగరాజు అఖిల్‌పై చూపించిన అభిమానాన్ని పలుమార్లు అఖిల్ కూడా తన ఇంటర్వ్యూల్లో ప్రస్తావించారు. అఖిల్ సినిమా విడుదలైన ప్రతిసారీ నాగరాజు రియాక్షన్ కోసం సోషల్ మీడియాలో అభిమానులు ఆసక్తిగా ఎదురుచూడటం కూడా ఒక సంప్రదాయంగా మారిపోయింది. తాజాగా విడుదలైన ‘లెనిన్’ సినిమా సందర్భంగా కూడా అదే ఉత్సాహం కనిపించింది.

‘లెనిన్’ విజయోత్సవ కార్యక్రమం గుంటూరులో నిర్వహించడంతో నాగరాజుకు తన అభిమాన హీరోను ప్రత్యక్షంగా కలిసే అవకాశం లభించింది. కార్యక్రమం అనంతరం అఖిల్ తన క్యారవాన్‌లో నాగరాజును ప్రత్యేకంగా కలుసుకున్నారు. ఎన్నాళ్లుగానో ఎదురుచూసిన ఆ క్షణం రావడంతో నాగరాజు భావోద్వేగానికి లోనయ్యాడు. అఖిల్ కాళ్లపై పడుతూ కన్నీళ్లు పెట్టుకున్నాడు.

అభిమాని ప్రేమను చూసి అఖిల్ కూడా భావోద్వేగానికి గురయ్యాడు. నాగరాజును లేవదీసి ఆప్యాయంగా హత్తుకుని ఓదార్చాడు. అంతేకాదు, ‘అయ్యగారు’ అనే పేరు ఇంతగా పాపులర్ కావడానికి కారణం నువ్వే అంటూ నాగరాజుకు ప్రత్యేకంగా కృతజ్ఞతలు తెలిపాడు. ఆ మాటలు విన్న నాగరాజు ఆనందంతో మరింత భావోద్వేగానికి గురయ్యాడు.

ఈ సందర్భంగా అఖిల్ తన భార్యకు కూడా నాగరాజును పరిచయం చేశాడు. అభిమానితో ఎంతో సాదాసీదాగా, ఆప్యాయంగా మాట్లాడిన అఖిల్ వ్యవహారశైలి అక్కడున్న వారిని ఆకట్టుకుంది. హీరో–అభిమాని మధ్య ఉన్న ఈ అనుబంధం చూసి అభిమానులు కూడా ప్రశంసలు కురిపిస్తున్నారు.

ఇదిలా ఉండగా, ‘లెనిన్’ సక్సెస్ సెలబ్రేషన్స్‌లో మరో ఆసక్తికరమైన ఘటన చోటుచేసుకుంది. నాగరాజు ప్రసిద్ధి చెందిన డైలాగ్‌ను అఖిల్ భార్య స్టేజ్‌పై పలికారు. ‘అయ్యగారే నంబర్ వన్’ అంటూ ఆమె చెప్పడంతో సభలో ఉన్న అభిమానులు హర్షధ్వానాలు చేశారు. ఆ వీడియో కూడా సోషల్ మీడియాలో వైరల్ అవుతోంది.

ప్రస్తుతం అఖిల్, నాగరాజు మధ్య జరిగిన ఈ ఎమోషనల్ భేటీకి సంబంధించిన వీడియోలు నెట్టింట చక్కర్లు కొడుతున్నాయి. అభిమానుల ప్రేమను గౌరవిస్తూ అఖిల్ చూపించిన ఆప్యాయతకు నెటిజన్లు ప్రశంసలు కురిపిస్తున్నారు. హీరో–అభిమాని బంధానికి ఇదొక అరుదైన ఉదాహరణ అంటూ సోషల్ మీడియాలో కామెంట్లు వెల్లువెత్తుతున్నాయి.