ఈ ‘వారణాసి’ పోస్టర్‌లో మునుపెన్నడూ చూడని లుక్‌లో దర్శనమిచ్చి ఆశ్చర్యపరిచింది ప్రియాంక. పాత్ర స్వభావాన్ని ఎలివేట్ చేసేలా ఆసక్తికరమైన క్యాప్షన్ ఇస్తూ రాజమౌళి వదిలిన ఈ లుక్ చూసి మహేష్ బాబు ఫ్యాన్స్ ఫిదా అవుతున్నారు. ఈ పవర్ ఫుల్ పోస్టర్‌ను పంచుకుంటూ తన కో-స్టార్‌కు బర్త్‌డే విషెస్ తెలుపుతున్నారు. అయితే ఈ పాత్ర కోసం తాను ఏకంగా 14 నెలలుగా కఠిన శిక్షణ తీసుకున్నానని, హాలీవుడ్ స్థాయి యాక్షన్ సీక్వెన్సులు, హై-వోల్టేజ్ స్లో-మోషన్ స్టంట్స్ ఇందులో ఉండబోతున్నాయని ప్రియాంక ఇటీవల చెప్పిన సంగతి తెలిసిందే.

ఈ భారీ సినిమాను రూ. 1,200 నుంచి రూ. 1,500 కోట్ల వ్యయంతో అంతర్జాతీయ ప్రమాణాలతో నిర్మిస్తున్నారు. హాలీవుడ్ స్టూడియోల భాగస్వామ్యంతో వరల్డ్ క్లాస్ వీఎఫ్ఎక్స్ (VFX) పనులు జరుగుతున్నాయి. పురాణాలు, చరిత్ర, సైన్స్ ఫిక్షన్ ఎలిమెంట్స్ కలగలిపిన టైమ్-ట్రావెల్ కాన్సెప్ట్‌తో రాజమౌళి ఈ కథను సిద్ధం చేశారు. పవిత్ర నగరమైన వారణాసిని ఒక భారీ గ్రహశకలం ఢీకొట్టబోయే విపత్కర పరిస్థితుల్లో ఈ కథ మొదలవుతుంది. ఆ ప్రళయం నుంచి ప్రపంచాన్ని కాపాడేందుకు మహేష్ బాబు ‘రుద్ర’ అనే సాహసికుడిగా పురాతన విశ్వ శక్తిని వెతికే వేటలో అడుగుపెడతారు. ఈ సాహస యాత్రలో కథ త్రేతా యుగంలోని రామాయణ కాలం నుంచి నేటి కలియుగం వరకు ప్రయాణిస్తుంది. దట్టమైన ఆఫ్రికా అడవుల నుంచి అంటార్కిటికా మంచు ఖండాల వరకు సాగే ఈ ప్రయాణం ప్రేక్షకులకు రోమాలు నిక్కబొడుచుకునే అనుభూతిని ఇవ్వనుందని తెలుస్తోంది. అంతేకాదు మహేష్ బాబు ‘శ్రీరాముడి’ అవతారంలో కనిపించే ఓ ప్రత్యేక ఎపిసోడ్ సినిమాకే హైలైట్‌గా నిలవనుందని తెలుస్తోంది.

ఇకపోతే ఈ గ్లోబల్ ప్రాజెక్ట్‌లో మెయిన్ విలన్ ‘కుంభ’గా మలయాళ స్టార్ హీరో పృథ్వీరాజ్ సుకుమారన్ నటిస్తున్నారు. విశేషమేమిటంటే.. ఈ సినిమా కోసం నటీనటులు ముందస్తుగా భారీ రెమ్యునరేషన్లు తీసుకోకుండా, లాభాల్లో వాటాలు పంచుకునే (Profit Sharing) హాలీవుడ్ మోడల్‌ను అనుసరిస్తున్నట్లు సమాచారం. అన్ని కార్యక్రమాలు చకచకా పూర్తి చేసి వచ్చే ఏడాది అనగా 2027 ఏప్రిల్ 7 వ తేదీన ఈ సినిమాను రిలీజ్ చేయాలని టార్గెట్ పెట్టుకున్నారు రాజమౌళి.