న్యూస్18 హిందీ కథనం ప్రకారం.. బీహార్‌లో పుట్టిన సోమన్ రాణా, భారత సైన్యంలో గూర్ఖా రైఫిల్స్‌లో చేరి జాతీయ స్థాయి బాక్సర్‌గా ఎదిగాడు. 2006 డిసెంబర్‌లో జమ్మూ కాశ్మీర్‌ పూంచ్ సెక్టార్‌లో జరిగిన ఆర్మీ సెర్చ్ ఆపరేషన్‌లో పాల్గొన్నాడు. అక్కడ ప్రమాదవశాత్తూ ఒక ల్యాండ్‌మైన్‌పై కాలు వేయడంతో జరిగిన భారీ పేలుడులో అతడి కుడి కాలు మోకాలి కింద వరకు తీసేయాల్సి వచ్చింది. దీంతో క్షణాల్లోనే బాక్సింగ్ కెరీర్ ముగిసిపోయింది.

కృత్రిమ అవయవంతో కోలుకున్న తర్వాత సుమారు పదేళ్ల పాటు సైన్యంలో అడ్మినిస్ట్రేటివ్ బాధ్యతలు నిర్వహించాడు. ఇక ఆటల జీవితం ముగిసిపోయిందని భావించిన దశలో, 2017లో కల్నల్ గౌరవ్ దత్తా అతడిని పుణెలోని ఆర్మీ పారాలింపిక్ నోడ్‌కు పరిచయం చేశారు. బాక్సింగ్‌లో తాను నేర్చుకున్న శారీరక బలం, బ్యాలెన్స్ షాట్‌పుట్‌లో ఉపయోగపడుతుందని గ్రహించి పారా షాట్‌పుట్‌ను ఎంచుకున్నాడు. కూర్చుని విసిరే F57 విభాగంలో కఠోర సాధన చేశాడు.

పారా అథ్లెటిక్స్‌లోకి ప్రవేశించాక సోమన్ వెనుతిరిగి చూడలేదు. 2021 ట్యూనిస్ వరల్డ్ గ్రాండ్‌ప్రిక్స్‌లో స్వర్ణం, 2022 ఆసియా పారా గేమ్స్‌లో రజతం గెలిచాడు. టోక్యో, పారిస్ పారాలింపిక్స్‌లో తృటిలో పతకాలు చేజార్చుకున్నా.. 2025 ప్రపంచ ఛాంపియన్‌షిప్‌లో 14.69 మీటర్ల అత్యుత్తమ త్రోతో కాంస్యం సాధించాడు. ఇప్పుడు 2026 కామన్వెల్త్ గేమ్స్‌లో ఏకంగా స్వర్ణం సాధించి ఎందరికో ఆదర్శంగా నిలిచాడు.