ఫస్ట్ లుక్ విడుదల సందర్భంగా మాట్లాడిన వి.వి. వినాయక్.. కొత్త దర్శకుడు వాచస్పతికి శుభాకాంక్షలు తెలిపారు. మంచి కథతో ప్రేక్షకుల ముందుకు వస్తున్న ఈ సినిమా విజయవంతం కావాలని ఆకాంక్షించారు. హీరో రామ్ కార్తీక్‌కు ఈ చిత్రం కెరీర్‌లో మరో మంచి మైలురాయిగా నిలవాలని కోరుకుంటున్నానని చెప్పారు. అలాగే సంగీత దర్శకుడు ఆర్.ఆర్. ధృవన్ ప్రతిభావంతుడైన సంగీతకారుడని, పాటలు రాయడంతో పాటు సంగీతం అందించే బహుముఖ ప్రజ్ఞాశాలి అని ప్రశంసించారు. ఈ సినిమా ద్వారా ధృవన్‌కు మరింత గుర్తింపు రావాలని, మొత్తం చిత్రబృందానికి ప్రేక్షకుల ఆదరణ లభించాలని ఆయన ఆకాంక్షించారు.

దర్శకుడు వాచస్పతి మాట్లాడుతూ.. వి.వి. వినాయక్ లాంటి స్టార్ డైరెక్టర్ చేతుల మీదుగా తమ సినిమా టైటిల్ పోస్టర్ విడుదల కావడం ఎంతో ఆనందంగా ఉందన్నారు. ఇది తమకు మంచి ఆత్మవిశ్వాసాన్ని ఇచ్చిందని చెప్పారు. ‘మిస్సింగ్ మేఘన’ ఒక పూర్తి స్థాయి సస్పెన్స్ ఇన్వెస్టిగేటివ్ థ్రిల్లర్ అని, ప్రేక్షకులను చివరి వరకు ఆసక్తిగా కూర్చోబెట్టే అంశాలు ఇందులో ఉంటాయని వెల్లడించారు. థ్రిల్, ఎమోషన్, ట్విస్టులతో కూడిన కథను సిద్ధం చేశామని, త్వరలోనే సినిమాను ప్రేక్షకుల ముందుకు తీసుకురానున్నామని తెలిపారు. మీడియా ఎప్పటిలాగే తమ చిత్రానికి సహకరిస్తుందని ఆశాభావం వ్యక్తం చేశారు.

హీరో రామ్ కార్తీక్ మాట్లాడుతూ.. ఈ అవకాశాన్ని కల్పించిన దర్శకుడు వాచస్పతి, నిర్మాత పంచుమర్తి నరేష్ బాబుకు ప్రత్యేక కృతజ్ఞతలు తెలిపారు. అలాగే తమ సినిమా పోస్టర్‌ను విడుదల చేసిన వి.వి. వినాయక్‌కు ధన్యవాదాలు చెప్పారు. ప్రేక్షకులు తప్పకుండా ఈ సినిమాను ఆదరిస్తారని, ప్రతి ఒక్కరికీ నచ్చే విధంగా చిత్రం రూపొందిందనే నమ్మకం ఉందన్నారు.

సంగీత దర్శకుడు ఆర్.ఆర్. ధృవన్ మాట్లాడుతూ.. లెజెండరీ దర్శకుడు వి.వి. వినాయక్ చేతుల మీదుగా పోస్టర్ విడుదల కావడం తనకు ఎంతో సంతోషాన్ని కలిగించిందన్నారు. ఒక సంగీత దర్శకుడిగా తన ప్రతిభను ప్రదర్శించే అవకాశం ఈ చిత్రం ఇచ్చిందని తెలిపారు. కథలో ఉన్న సస్పెన్స్, భావోద్వేగాలు, థ్రిల్లింగ్ ఎలిమెంట్స్‌కు తగ్గట్టుగా సంగీతాన్ని రూపొందించామని చెప్పారు. ఈ చిత్రం ప్రేక్షకులను తప్పకుండా ఆకట్టుకుంటుందని, తమ మొత్తం టీమ్‌కు ప్రేక్షకులు ఆశీస్సులు, ఆదరణ అందించాలని కోరారు. ఫస్ట్ లుక్‌తోనే ఆసక్తి పెంచిన ‘మిస్సింగ్ మేఘన’ త్వరలో ప్రేక్షకుల ముందుకు వచ్చి థ్రిల్లర్ ప్రేమికులకు కొత్త అనుభూతిని అందించేందుకు సిద్ధమవుతోంది.