ఏపీలో పర్యాటక రంగాన్ని అభివృద్ధి చేయడానికి, అలాగే భారీ ఎత్తున జాతీయ, అంతర్జాతీయ పెట్టుబడులను ఆకర్షించడానికి రాష్ట్ర ప్రభుత్వం చిరంజీవికి ఉన్న అపారమైన ప్రజాదరణను వినియోగించుకోవాలని భావిస్తోందని సోషల్ మీడియాలో వార్తలు చక్కర్లు కొట్టాయి. ఈ క్రమంలోనే ఆయనకు ఏపీ బ్రాండ్ అంబాసిడర్ బాధ్యతలు అప్పగించనున్నారని ప్రచారం జరిగింది. దీనిపై స్పందించిన చిరు టీమ్.. ఆ వార్తల్లో ఏమాత్రం వాస్తవం లేదని తేల్చి చెప్పింది. ప్రభుత్వం నుంచి అలాంటి ప్రతిపాదన ఏమీ రాలేదని, దయచేసి ఇలాంటి ధ్రువీకరించని, అసత్య వార్తలను ప్రచారం చేయవద్దని కోరింది. ఈ మేరకు ‘ఎక్స్’ (ట్విట్టర్) వేదికగా ఓ అధికారిక ప్రకటన విడుదల చేయడంతో ఈ వదంతులకు చెక్ పడినట్లైంది.

రాజకీయాల నుంచి తప్పుకుని, సెకండ్ ఇన్నింగ్స్ ప్రారంభించిన తర్వాత చిరంజీవి తన పూర్తి కాలాన్ని కేవలం సినిమాలకే కేటాయిస్తున్నారు. యువ కథానాయకులకు ఏమాత్రం తీసిపోని విధంగా, జెట్ స్పీడ్‌తో ఒకదాని తర్వాత ఒకటి వరుస ప్రాజెక్టులను ప్రకటిస్తూ బాక్సాఫీస్ వద్ద సందడి చేస్తున్నారు. ప్రస్తుతం ఆయన లైనప్ చూస్తే మెగా అభిమానులకు పండగే అని చెప్పవచ్చు.