న్యూస్18 ఇంగ్లీష్ కథనం ప్రకారం.. ఈ విజయంతో జూనియర్ స్క్వాష్‌ పోటీల్లో దాదాపు 15 ఏళ్లుగా కొనసాగుతున్న ఈజిప్ట్ దేశ ఆధిపత్యానికి అనాహత్ సింగ్ గట్టి బ్రేక్ వేసింది. 2010లో అమెరికాకు చెందిన అమండా సోభీ తర్వాత ఈ టైటిల్ గెలిచిన నాన్-ఈజిప్షియన్ ప్లేయర్‌గా ఆమె నిలిచింది. టోర్నీ ఆసాంతం తన అద్భుతమైన నియంత్రణతో ప్రత్యర్థులకు ఏమాత్రం అవకాశం ఇవ్వలేదు. ఆడిన ఆరు మ్యాచ్‌ల్లో కేవలం రెండు గేమ్స్ మాత్రమే కోల్పోయిందంటే ఆమె ఆధిపత్యం ఎంతలా ఉందో అర్థం చేసుకోవచ్చు. తొలి మూడు రౌండ్లలో ఎలాంటి కష్టపడకుండానే సునాయాస విజయాలు నమోదు చేసింది.

టోర్నీ కీలక దశకు చేరుకున్నాక అనాహత్‌కు బలమైన ఈజిప్ట్ క్రీడాకారిణుల నుంచి సవాల్ ఎదురైంది. క్వార్టర్ ఫైనల్లో హబీబా రిజ్క్‌పై 3-1 తేడాతో గెలిచిన ఆమె, సెమీస్‌లో బార్బ్ సమీహ్‌ను కూడా 3-1 తేడాతోనే మట్టికరిపించింది. ఇక ఫైనల్లో రుకయ్యా సలేమ్‌ను చిత్తు చేసి తన సుదీర్ఘ కలను నెరవేర్చుకుంది. గత ఏడాది కైరోలో జరిగిన టోర్నీలో కాంస్య పతకం గెలిచిన అనాహత్, ఇప్పుడు దాన్ని స్వర్ణంగా మార్చుకుని భారత స్క్వాష్ క్రీడలో ఒక కొత్త శకానికి నాంది పలికింది. ఆసియా క్రీడలు, కామన్వెల్త్ గేమ్స్‌లోనూ ఆమె భారత్‌కు ప్రాతినిధ్యం వహించింది.

అనాహత్ సింగ్ సాధించిన చారిత్రాత్మక విజయంపై భారత ప్రధానమంత్రి నరేంద్ర మోదీ ప్రత్యేకంగా హర్షం వ్యక్తం చేశారు. దేశానికి తొలిసారి వరల్డ్ జూనియర్ స్క్వాష్ టైటిల్ అందించిన అనాహత్ గురించి గర్వపడుతున్నానని ఆయన సోషల్ మీడియా వేదికగా అభినందించారు. ఈ అద్భుతమైన విజయం దేశంలోని యువతకు ఎంతో స్ఫూర్తినిస్తుందని, రాబోయే రోజుల్లో స్క్వాష్ క్రీడ పట్ల యువతలో మరింత ఆసక్తి పెరుగుతుందని ప్రధాని మోదీ ఆశాభావం వ్యక్తం చేశారు. క్రీడా మంత్రి మన్సుఖ్ మాండవీయ కూడా ఆమె సాధించిన ఈ ఘనత ప్రతి భారతీయుడు గర్వించదగ్గ క్షణం అని ప్రశంసించారు.