ప్రకాష్ రాజ్ వ్యక్తిగత జీవితాన్ని సైతం టార్గెట్ చేస్తూ బండ్ల గణేష్ చేసిన ఘాటు విమర్శలు ఇప్పుడు ఇండస్ట్రీలో సంచలనంగా మారాయి. గత కొంతకాలంగా ఏపీలోని టీడీపీ-జనసేన-బీజేపీ కూటమి ప్రభుత్వ నిర్ణయాలను, డిప్యూటీ సీఎం పవన్ కళ్యాణ్ వైఖరిని ప్రకాష్ రాజ్ తన ‘జస్ట్ ఆస్కింగ్’ (#justasking) వేదికగా తీవ్రంగా ప్రశ్నిస్తున్న విషయం తెలిసిందే.

ముఖ్యంగా సోషల్ మీడియా యాక్టివిస్ట్ ల అరెస్టుల పర్వంలో ‘ప్రశ్న రావణ్’ అరెస్టును ఖండిస్తూ ఆయన కూటమి ప్రభుత్వంపై విరుచుకుపడ్డారు. ఈ క్రమంలోనే ప్రభుత్వ తీరును ఎండగడుతూ.. “మీరు ఆట మొదలు పెట్టారు… ప్రజలు దానికి ముగింపు పలుకుతారు. గేమ్ ఆన్ (GAME ON) #justasking” అంటూ ఒక పవర్‌ఫుల్ వీడియోను ఎక్స్ (ట్విట్టర్) వేదికగా పోస్ట్ చేశారు.

రెచ్చిపోయిన బండ్ల గణేష్.. పర్సనల్ ఎటాక్: ప్రకాష్ రాజ్ చేసిన ఈ ట్వీట్ జనసైనికులకు, పవన్ అభిమానులకు తీవ్ర ఆగ్రహాన్ని తెప్పించింది. ఈ నేపథ్యంలో పవన్ కళ్యాణ్‌ను తన దైవంగా ఆరాధించే బండ్ల గణేష్ నేరుగా రంగంలోకి దిగారు. ప్రకాష్ రాజ్ వృత్తిగత, వ్యక్తిగత జీవితాన్ని టార్గెట్ చేస్తూ మునుపెన్నడూ లేని విధంగా కౌంటర్ ఇచ్చారు. ప్రకాష్ రాజ్‌కు అసలు సినిమాలే లేవంటూ కెరీర్‌ను కూడా లాగుతూ దారుణమైన వ్యాఖ్యలు చేశారు.