“ప్రస్తుతం సెలబ్రిటీల భద్రతా ప్రమాణాలు పూర్తిగా కార్పొరేట్ స్థాయికి మారిపోయాయి. ఒక ప్రొఫెషనల్ బాడీగార్డ్‌గా రాణించాలంటే కేవలం జిమ్‌కు వెళ్లి బాడీ పెంచడం మాత్రమే సరిపోదు. అత్యున్నత మానసిక, శారీరక లక్షణాలు కూడా ఉండాలి. ముఖ్యంగా ‘డైనమిక్ రిస్క్ అసెస్‌మెంట్’ అంటే పరిస్థితులను ముందుగానే అంచనా వేసే సామర్థ్యం చాలా కీలకం. రద్దీ ప్రదేశాల్లో ఎటువైపు నుంచి ప్రమాదం రావచ్చో సెకన్లలో గుర్తించాలి. అభిమానులు లేదా మీడియా ఎంత ఒత్తిడి తీసుకొచ్చినా సహనం కోల్పోకుండా, క్లయింట్ ఇమేజ్ దెబ్బతినకుండా ‘హ్యూమన్ షీల్డ్’లా వ్యవహరించే ఎమోషనల్ ఇంటెలిజెన్స్ కూడా అవసరం. గంటల తరబడి అలసట లేకుండా అప్రమత్తంగా ఉండే స్టామినా, అత్యవసర పరిస్థితుల్లో విఐపీలను సురక్షితంగా తరలించే టాక్టికల్ డ్రైవింగ్ నైపుణ్యాలు కూడా తప్పనిసరిగా ఉండాలి” అని SVSS సెక్యూరిటీస్ ప్రొప్రైటర్ ఎస్‌వీ రెడ్డి న్యూస్18 తెలుగుతో చెప్పారు.

అంతర్జాతీయ స్థాయిలో, భారతదేశంలో అగ్ర శ్రేణి సెలబ్రిటీల వద్ద హై-పెయిడ్ సెక్యూరిటీ ఆఫీసర్‌గా స్థిరపడటానికి కొన్ని కీలకమైన సర్టిఫికేషన్లు తప్పనిసరి. ప్రపంచవ్యాప్తంగా విఐపి సెక్యూరిటీ రంగంలో బ్రిటన్‌కు చెందిన SIA (Security Industry Authority) Close Protection Licence కు అత్యంత గుర్తింపు ఉంది. అంతర్జాతీయ బాడీగార్డ్స్ చాలామంది ఈ కఠినమైన శిక్షణ పూర్తి చేసినవారే ఉంటారు. భారతదేశంలో అయితే కేంద్ర ప్రభుత్వ పరిధిలోని SSSDC (Security Sector Skill Development Council) ద్వారా పర్సనల్ ప్రొటెక్షన్ కోర్సులు పూర్తి చేయవచ్చు. వీటితో పాటు అత్యవసర పరిస్థితుల్లో ప్రాణాలు కాపాడేందుకు HECPO లేదా Red Cross సంస్థల నుండి లభించే అడ్వాన్స్‌డ్ ప్రథమ చికిత్స (First Aid & CPR) సర్టిఫికేషన్లు కలిగి ఉండటం తప్పనిసరి.