బాధిత యువకుడి తండ్రి హనుమంతరావు పోలీసులకు ఇచ్చిన ఫిర్యాదు మేరకు ఈ ఆర్థిక మోసం వెలుగులోకి వచ్చింది. తన కుమారుడికి సినిమాలపై ఉన్న ఆసక్తిని గమనించిన హనుమంతరావు.. దర్శకుడు అశోక్ బాబును సంప్రదించారు. ఆ యువకుడిని మెయిన్ లీడ్‌గా పెట్టి ఒక భారీ బడ్జెట్ సినిమాను రూపొందిస్తానని, ఇందుకు సంబంధించిన పూర్తి బాధ్యత తనదేనని అశోక్ బాబు నమ్మబలికారు. ఈ అగ్రిమెంట్ తో ప్రాజెక్టును ప్రారంభించేందుకు అశోక్ బాబు పలు దఫాలుగా హనుమంతరావు నుంచి మొత్తం రూ.3.5 కోట్లు వసూలు చేశారు.

ఈ ఫిర్యాదును సీరియస్‌గా తీసుకున్న సైబరాబాద్ ఈఓడబ్ల్యూ (EOW) అధికారులు, దర్శకుడు అశోక్ బాబుతో పాటు ఈ ప్రాజెక్టులో భాగస్వామిగా ఉన్నారని భావిస్తున్న నిర్మాత విజయలక్ష్మిపై చీటింగ్ కేసు నమోదు చేశారు. ఇరువురిని విచారణకు హాజరుకావాలని ఆదేశించారు. ఈ రూ.3.5 కోట్ల లావాదేవీలు ఎలా జరిగాయి? బ్యాంక్ అకౌంట్ స్టేట్‌మెంట్లు, వారి మధ్య కుదిరిన సినిమా నిర్మాణ ఒప్పంద పత్రాలు, ఆడియో ఆధారాలను అధికారులు క్షుణ్ణంగా పరిశీలిస్తున్నారు. విచారణలో నేరం రుజువైతే వీరిపై కఠిన చట్టపరమైన చర్యలు తీసుకునే అవకాశం ఉందని పోలీసులు స్పష్టం చేశారు.