కామన్వెల్త్ క్రీడల నుంచి ప్రధాన ఆటలను తీసివేయడంపై సైనా మాట్లాడుతూ: “బ్యాడ్మింటన్, హాకీ, షూటింగ్ వంటి క్రీడల్లో కామన్వెల్త్ గేమ్స్‌లో మనం ఎన్నో స్వర్ణ పతకాలు సాధించాం. ఈసారి ఆ క్రీడలు అక్కడ లేకపోవడం చాలా ఆశ్చర్యంగా ఉంది. 2006 నుండి 2022 వరకు జరిగిన ప్రతి కామన్వెల్త్ క్రీడల్లోనూ మేము పాల్గొన్నాం. ప్రస్తుతం ఆయా ఆటల ప్లేయర్లు ఎలా భావిస్తున్నారో ఊహించుకుంటే బాధగా ఉంది. 2030లో భారత్ మళ్లీ కామన్వెల్త్ గేమ్స్‌కు ఆతిథ్యం ఇవ్వబోతోంది. అప్పుడు ఈ ఈవెంట్లు మళ్లీ వస్తాయని నమ్ముతున్నాను. కానీ, అంతటి పెద్ద క్రీడలను ఇప్పుడు ఎలా తొలగిస్తారో నాకు అర్థం కావడం లేదు. ఇది తీవ్రంగా నిరాశపరిచే అంశం.” అని వ్యాఖ్యానించారు.

ఈ నిర్ణయం వల్ల యువ అథ్లెట్లు మానసికంగా కుంగిపోకూడదని సైనా సూచించారు. “ఆటగాళ్లు ఎప్పుడూ ఆగిపోరు. వారు నిరంతరం శ్రమిస్తూ, రాబోయే టోర్నమెంట్లపై దృష్టి పెట్టాలి. అయితే, యువ క్రీడాకారులకు ఇది చాలా కష్టమైన సమయం. ఒక పెద్ద అంతర్జాతీయ టోర్నమెంట్ చేతిజారిపోయిందని వారు భావిస్తారు. ఉదాహరణకు ఉన్నతికి ఈసారి అవకాశం వచ్చి ఉండేది. అంతర్జాతీయ అనుభవాన్ని గడించడానికి ఇదొక మంచి టోర్నమెంట్, కానీ ఆమె ఆ అవకాశాన్ని కోల్పోతోంది. రాబోయే ఆసియా గేమ్స్‌లో ఆమె ఎలా రాణిస్తుందో చూడాలి.” అని పేర్కొన్నారు.

భారత బ్యాడ్మింటన్ భవిష్యత్తుపై స్పందిస్తూ, తదుపరి తరం ఆటగాళ్ల కొరత ఉందన్న విషయాన్ని సైనా గుర్తుచేశారు: “గత కొన్ని సంవత్సరాలుగా సింధు అద్భుతంగా రాణిస్తోంది. కానీ, ఈపాటికే ఆమె వెనుక మరో నలుగురైదుగురు యువ ఆటగాళ్లు సిద్ధంగా ఉండాలి. సింధు రిటైర్ అయ్యే సమయానికి బాధ్యతలు స్వీకరించేందుకు తదుపరి తరం సిద్ధంగా ఉండాలి, కానీ మహిళల బ్యాడ్మింటిన్‌లో మనం ఇంకా ఆ ఎదురుచూపుల్లోనే ఉన్నాం. పురుషుల విభాగానికీ ఇది వర్తిస్తుంది. లక్ష్య సేన్ తర్వాత ఆయుష్ శెట్టి తప్ప మరో బలమైన లైన్-అప్ కనిపించడం లేదు. ఇక్కడే మనం వెనుకబడుతున్నాం.” అని ఆవేదన వ్యక్తం చేశారు.