2010లో న్యూఢిల్లీ తర్వాత భారత్ కామన్వెల్త్ క్రీడలకు ఆతిథ్యమివ్వడం ఇది రెండోసారి కాగా, 2030లో జరగబోయే ఈ ఈవెంట్ కామన్వెల్త్ గేమ్స్ శతాబ్ది (Centenary) వేడుక కావడం విశేషం. బ్రిటన్ రాజా చార్లెస్ III తరఫున ఎడిన్‌బర్గ్ డ్యూక్ ప్రిన్స్ ఎడ్వర్డ్ క్రీడల ముగింపును అధికారికంగా ప్రకటిస్తూ, కామన్వెల్త్ అథ్లెట్లందరినీ 24వ కామన్వెల్త్ క్రీడల కోసం భారత్‌లోని అహ్మదాబాద్‌కు ఆహ్వానించారు.

ఆతిథ్య బాధ్యతల అప్పగింత అనంతరం భారత్ “వసుధైవ కుటుంబకం” (ప్రపంచమంతా ఒకే కుటుంబం) అనే సిద్ధాంతంతో రూపొందించిన సాంస్కృతిక కార్యక్రమాలు అందరినీ ఆకట్టుకున్నాయి. నటి మానుషి ఛిల్లర్ నేతృత్వంలో ‘వందేమాతరం’ 150 ఏళ్ల వేడుకలను పురస్కరించుకుని ప్రదర్శించిన నృత్య రూపకం విశేషంగా నిలిచింది. ప్రఖ్యాత సంగీత దర్శకుడు శంకర్ మహదేవ్ సింఫనీ సంగీతం దానికి అదనపు ఆకర్షణగా నిలిచింది. సితార్ విద్వాంసుడు రిషబ్ శర్మ, స్కాటిష్ సంగీతకారుడు రోస్ ఐన్స్లీ కలిసి ప్రదర్శించిన ‘ది కల్చరల్ జుగల్బందీ’ భారత-స్కాటిష్ సంస్కృతుల కలయికకు అద్దం పట్టింది. శంకర్ మహదేవ్ ఆయన కుమారులు సిద్ధార్థ్, శివమ్‌లతో కలిసి “సునో గౌర్ సే దునియా వాలోన్”, “భాగ్‌ మిల్కా భాగ్”, “ఏ వతన్”, “లేహరా దో” వంటి దేశభక్తి గీతాలను ఆలపించగా, గుజరాతీ గాయని భూమి త్రివేది ప్రత్యేక ప్రదర్శన ఇచ్చారు. మహిళల 57 కేజీల బాక్సింగ్‌లో పసిడి నెగ్గిన జైస్మీన్ లంబోరియా ముగింపు వేడుకల్లో భారత పతాకధారిగా వ్యవహరించారు.

గత బర్మింగ్‌హామ్ క్రీడల్లో భారత్ సాధించిన 61 పతకాలతో పోలిస్తే ఈసారి సంఖ్య తగ్గినప్పటికీ, భారత్‌కు బలమైన షూటింగ్, రెజ్లింగ్, బ్యాడ్మింటన్, హాకీ, టేబుల్ టెన్నిస్ వంటి క్రీడలను 2026 ప్రణాళిక నుంచి తొలగించడమే దీనికి ప్రధాన కారణం. గతంలో సాధించిన పతకాలలో 30 పతకాలు ఈ తొలగించిన క్రీడల నుంచే రావడం గమనార్హం. పరిమిత క్రీడలు, చిన్న బృందంతో బరిలోకి దిగినప్పటికీ భారత క్రీడాకారులు విశేష రాణింపుతో దేశ కీర్తిపతాకాన్ని సగర్వంగా ఎగరవేశారు.