టాలెంటెడ్ డైరెక్టర్ ఆదిత్య ధర్ దర్శకత్వంలో, బాలీవుడ్ ఎనర్జిటిక్ స్టార్ రణవీర్ సింగ్ ప్రధాన పాత్రలో తెరకెక్కిన ఈ చిత్రం బాక్సాఫీస్ వద్ద కనకవర్షం కురిపించింది. గతేడాది డిసెంబర్‌లో వచ్చిన ‘ధురంధర్’ మొదటి భాగానికి సీక్వెల్‌గా వచ్చిన ఈ సెకండ్ పార్ట్ ప్రపంచవ్యాప్తంగా ఏకంగా 1,812 కోట్లకు పైగా గ్రాస్ వసూళ్లను సాధించి సరికొత్త రికార్డులను సృష్టించింది. కేవలం భారతదేశంలోనే ఈ చిత్రం 1,148 కోట్ల నెట్ కలెక్షన్లు రాబట్టింది. ఈ ఫ్రాంచైజీలోని రెండు భాగాలు కలిపి మొత్తంగా 3,000 కోట్లకు పైగా గ్రాస్ వసూలు చేయడం భారతీయ సినిమా చరిత్రలోనే ఒక అరుదైన రికార్డుగా నిలిచింది.

మొదటి భాగంలో మిగిల్చిన ఎన్నో ఉత్కంఠభరితమైన ప్రశ్నలకు ఈ సీక్వెల్‌లో సమాధానాలు ఇచ్చారు దర్శకుడు. కథ విషయానికి వస్తే… దేశభక్తితో సైన్యంలో చేరాలనుకున్న జస్కరిత్ సింగ్ రంగీ (రణవీర్ సింగ్), తన సొంత ఊరిలో జరిగిన ఒక వివాదంలో స్థానిక ఎమ్మెల్యే ఇంటిపై దాడి చేసి 15 మందిని చంపేస్తాడు. ఆ తర్వాత జైలు శిక్ష అనుభవిస్తున్న అతడిని ఒక సీక్రెట్ ఆపరేషన్ కోసం భారత ఇంటెలిజెన్స్ రంగంలోకి దించుతుంది. దాంతో అతను ‘హమ్జా’గా పేరు మార్చుకుని పాకిస్తాన్‌లోని ల్యారీ (Lyari) పట్టణానికి వెళ్తాడు. అక్కడ అండర్‌వరల్డ్ డాన్, బలోచ్ తెగ నాయకుడు రెహమాన్ డెకాయిట్ (అక్షయ్ ఖన్నా)ను హమ్జా హతమారుస్తాడు.