కేంద్ర ప్రభుత్వ ఆదేశాలను అనుసరించి హైదరాబాద్‌లోని శంషాబాద్ అంతర్జాతీయ విమానాశ్రయంలో విమానాశ్రయ ఆరోగ్య సంస్థ (ఏపీహెచ్‌ఓ) అధికారులు రంగంలోకి దిగారు. విదేశాల నుండి, ముఖ్యంగా ఎబోలా ప్రభావిత ప్రాంతాల నుంచి వచ్చే ప్రయాణికులకు విధిగా వైద్య పరీక్షలు నిర్వహించేలా ప్రత్యేక ఏర్పాట్లు చేశారు. విమానాశ్రయంలోని అరైవల్ లాంజ్ వద్ద అత్యాధునిక థర్మల్ స్క్రీనింగ్ పరికరాలను అమర్చారు. వైద్య బృందాలు నిరంతరం నిఘా ఉంచుతూ ప్రతి ఒక్క ప్రయాణికుడి శరీర ఉష్ణోగ్రతను నిశితంగా పరిశీలిస్తున్నాయి.

ఎబోలా ప్రాథమిక లక్షణాలు ఇవే.. ఈ స్క్రీనింగ్ పరీక్షల ద్వారా ఎబోలా వైరస్ లక్షణాలను ప్రాథమిక దశలోనే గుర్తించేందుకు వైద్యులు ప్రయత్నిస్తున్నారు. విదేశాల నుంచి వచ్చే ప్రయాణికులలో కింది లక్షణాలు ఉంటే వారిపై ప్రత్యేక దృష్టి సారిస్తున్నారు. తీవ్రమైన జ్వరం, విపరీతమైన అలసట, తలనొప్పి, కండరాల నొప్పులు, కీళ్ల నొప్పులు, వాంతులు, విరేచనాలు కావడం, ఎలాంటి కారణం లేకుండా శరీరం లోపల లేదా బయట రక్తస్రావం కావడం. ఇలాంటి లక్షణాలు ఉన్న ప్రయాణికులను విమానాశ్రయంలోని సాధారణ ప్రయాణికులతో కలవకుండా ముందే వేరు చేసి, ఎయిర్‌పోర్ట్ మెడికల్ క్యాంప్‌కు తరలిస్తున్నారు.

వైద్య పరీక్షల్లో ఎబోలా లక్షణాలు ఉన్నట్లు తేలిన లేదా అనుమానం ఉన్న వ్యక్తుల విషయంలో అధికారులు అత్యంత కఠినమైన నిబంధనలను అమలు చేస్తున్నారు. సదరు ప్రయాణికుల నుంచి ముందుగా చట్టబద్ధమైన ‘అంగీకార పత్రం’ తీసుకుంటున్నారు. అనంతరం వారిని ప్రత్యేక అంబులెన్స్‌లలో ప్రభుత్వ ఐసోలేషన్ వార్డులకు లేదా క్వారంటైన్ కేంద్రాలకు తరలిస్తున్నారు. అక్కడ వారికి మరిన్ని నిర్ధారణ పరీక్షలు నిర్వహించి, వైరస్ పాజిటివ్ అని తేలితే ప్రత్యేక నిపుణుల పర్యవేక్షణలో ప్రభుత్వ ఆసుపత్రుల్లో ఉచితంగా మెరుగైన చికిత్స అందించనున్నారు.

అంతర్జాతీయ విమాన సర్వీసుల ద్వారా వచ్చే ప్రయాణికులు ఎయిర్‌పోర్ట్ సిబ్బందికి, వైద్య బృందాలకు పూర్తి స్థాయిలో సహకరించాలని ఏపీహెచ్‌ఓ అధికారులు కోరారు. ముఖ్యంగా ప్రయాణానికి ముందు గానీ, ప్రయాణ సమయంలో గానీ ఎవరికైనా అనారోగ్య లక్షణాలు కనిపిస్తే స్వచ్ఛందంగా అధికారులకు సమాచారం అందించాలని సూచించారు. విమానాశ్రయంలో తనిఖీల కారణంగా ప్రయాణికులకు కొద్దిగా సమయం పట్టినప్పటికీ, దేశ ప్రజల ఆరోగ్య భద్రత దృష్ట్యా ఈ చర్యలు తప్పనిసరని వైద్యులు స్పష్టం చేస్తున్నారు. ఈ తనిఖీల నేపథ్యంలో శంషాబాద్ విమానాశ్రయంలో వైద్య విభాగం హై అలర్ట్ ప్రకటించింది.