ముంబైలోని ప్రతిష్టాత్మక వాంఖడే స్టేడియం ఆ రోజు కేవలం అభిమానులతో నిండిన క్రీడా ప్రాంగణం కాకుండా, ఆశలు, ఆకాంక్షలు, అవకాశాల పండుగగా మారనుంది. ఈ మ్యాచ్‌కు సాధారణ టిక్కెట్ల విక్రయం ఉండదని నిర్వాహకులు వెల్లడించారు. పూర్తి స్థాయిలో పిల్లల కోసం అంకితం చేసిన ప్రత్యేక మ్యాచ్‌డేగా దీనిని నిర్వహించనున్నారు.

ESA 2026లో ప్రత్యేక అవసరాలు గల 200 మందికి పైగా పిల్లలు కూడా పాల్గొనడం విశేషం. వీరిలో నేషనల్ అసోసియేషన్ ఫర్ ది బ్లైండ్ (ఇండియా) నుంచి 95 మంది దృష్టి లోపం ఉన్న చిన్నారులు ఉన్నారు. వారికి తోడుగా 35 మంది హియరింగ్ బడ్డీస్‌ను కూడా నియమించారు. ఈ స్థాయిలో దృష్టి లోపం ఉన్న పిల్లలను స్టేడియం అనుభవంలో భాగం చేయడం ఇదే తొలిసారి అని నిర్వాహకులు చెబుతున్నారు. సమ్మిళితత్వానికి ఇది గొప్ప ఉదాహరణగా నిలుస్తుందని అభిప్రాయపడుతున్నారు.

500కి పైగా BEST, ప్రైవేట్ బస్సులు పిల్లల రవాణాకు వినియోగించనున్నారు

2,000 మందికి పైగా వాలంటీర్లు విధుల్లో పాల్గొననున్నారు

లక్షకు పైగా ఫుడ్ బాక్సులు, స్నాక్స్, పానీయాలు పంపిణీ చేయనున్నారు

650 మంది పోలీసులు, 300 మంది ట్రాఫిక్ సిబ్బంది భద్రత, ట్రాఫిక్ నిర్వహణ చేపట్టనున్నారు

ఇప్పటివరకు ESA ద్వారా 28 రాష్ట్రాల్లో 2.9 కోట్లకు పైగా పిల్లలు, యువత విద్యా మరియు క్రీడా కార్యక్రమాల ద్వారా లబ్ధి పొందినట్లు నిర్వాహకులు తెలిపారు. “ఇది కేవలం మ్యాచ్ కాదు.. ఆశల వేడుక” గతంలో ESA సందర్భంగా మాట్లాడిన నీతా అంబానీ ఈ మ్యాచ్‌ను ముంబై ఇండియన్స్‌కు అత్యంత ఇష్టమైన మ్యాచ్‌డేగా అభివర్ణించారు. “ఇది కేవలం క్రికెట్ మ్యాచ్ కాదు. ఆశలు, కలలు, ఆనందాల వేడుక. చాలా మంది పిల్లలకు ఇది స్టేడియంలో ప్రత్యక్ష మ్యాచ్ చూసే తొలి అనుభవం. వారి ముఖాల్లో కనిపించే ఆనందం ఎంతో భావోద్వేగానికి గురిచేస్తుంది,” అని ఆమె పేర్కొన్నారు. భారత క్రికెటర్లలో చాలామంది సాధారణ కుటుంబాల నుంచే ఎదిగారని, పిల్లలు కూడా పెద్ద కలలు కనాలని ఈ కార్యక్రమం ప్రేరణనిస్తోందని ఆమె అన్నారు.