రాయలసీమ ప్రాంతంలోనే అత్యంత ప్రసిద్ది గాంచిన ఈ గంగమ్మ జాతరకు జిల్లా నలుమూల నుండే కాదు తమిళనాడు, కర్నాటక నుండి కూడా భక్తులు పెద్ద సంఖ్యలో తరలివస్తుంటారు. ఈ ఉత్సవాలు ప్రతి రోజూ ప్రత్యేకమైన వేషధారణలతో కొనసాగడం ఈ జాతర ప్రత్యేకత. మే 5న ‘చాటింపు’తో ప్రారంభమయ్యే ఈ ఉత్సవాలు, మే 6న బైరాగి వేషం, మే 7న బండ వేషం,మే 8న తోట వేషం, మే 9న ధోర వేషం, మే 10న మాతంగి వేషం, మే 11న సున్నపు కుండలు వంటి సంప్రదాయ కార్యక్రమాలతో భక్తులను అలరిస్తాయి.

ఈ జాతరలో ప్రతి రోజు జరిగే వేషాలు సామాజిక సందేశాలను, స్థానిక సంస్కృతిని ప్రతిబింబిస్తాయి. గ్రామ దేవతగా గంగమ్మను భావించే ప్రజలు, ఆమెకు ప్రత్యేక పూజలు, నైవేద్యాలు సమర్పిస్తూ తమ కోరికలను తెలియజేస్తారు. మే 12న ప్రధాన గంగమ్మ జాతర రోజుగా అత్యంత వైభవంగా జరుగుతుంది, ఈ రోజున వేలాది మంది భక్తులు పాల్గొని అమ్మవారిని దర్శించుకుంటారు. అనంతరం మే 13న ‘విశ్వరూప దర్శనం’తో ఈ ఉత్సవాలు ముగుస్తాయి. ఈ జాతర తిరుపతి ప్రాంతీయ సంప్రదాయాలకు అద్దం పట్టేలా ఉండి, భక్తులకు ఆధ్యాత్మిక ఆనందాన్ని అందించడంతో పాటు పర్యాటకులను కూడా ఆకర్షించే విశిష్ట ఉత్సవంగా నిలుస్తుంది.