పోలీసులు వెల్లడించిన వివరాల ప్రకారం.. జూబ్లీహిల్స్ ప్రశాసన్‌నగర్‌లో మాజీ ఐపీఎస్ అధికారి వినయ్‌రంజన్ తన కుటుంబంతో కలిసి నివసిస్తున్నారు. వీరి ఇంట్లో నేపాల్ దేశానికి చెందిన కల్పన అనే మహిళ కొంతకాలంగా నమ్మకంగా పనిచేస్తోంది. అయితే, కల్పనకు నేపాల్‌కే చెందిన వికాస్ అనే వ్యక్తితో ప్రేమ వ్యవహారం ఉంది. వినయ్‌రంజన్ ఇంట్లో భారీగా నగదు, బంగారు ఆభరణాలు ఉన్నాయని గమనించిన కల్పన, ఆ విషయాన్ని తన ప్రియుడు వికాస్‌కు చేరవేసింది. ఎలాగైనా ఆ ఇంట్లో పెద్ద ఎత్తున చోరీ చేసి ఒకేసారి కోటీశ్వరులు కావాలని వీరిద్దరూ కొద్దిరోజుల క్రితమే పక్కా స్కెచ్ వేశారు.

ఈ దోపిడీని విజయవంతం చేయడం కోసం వికాస్ ఒక పెద్ద నేరపూరిత ముఠాను రంగంలోకి దించాడు. ఇందులో భాగంగా సునీల్ పెర్కార్, దిలీప్ బక్షకర్మ, సృజన్‌రాయి, నేత్రరాయి, దినేష్‌రాయి, శంకర్బహాదూ, గణేష్‌రాయి, కాలుచాకులను కలిపి ఒక ప్రొఫెషనల్ గ్యాంగ్‌గా మార్చాడు. మాజీ ఐపీఎస్ అధికారి వినయ్‌రంజన్ ఇంట్లో లేని సమయాన్ని కల్పన కనిపెట్టి, వెంటనే ఫోన్ ద్వారా ప్రియుడు వికాస్‌కు సమాచారం ఇచ్చింది. దీంతో ఈ నెల 7వ తేదీన సృజన్‌రాయి, నేత్రరాయి అనే ఇద్దరు నిందితులు ఆ ఇంటి పరిసరాల్లో తిరుగుతూ ‘రెక్కీ’ నిర్వహించారు. ఇల్లు దోపిడీకి అత్యంత అనుకూలంగా ఉందని వారు గ్యాంగ్ లీడర్ వికాస్‌కు గ్రీన్ సిగ్నల్ ఇచ్చారు.

పక్కా ప్రణాళిక ప్రకారం.. ఈ నెల 9వ తేదీ అర్ధరాత్రి దాటిన తర్వాత (ఒంటి గంట సమయంలో) నిందితులు ప్రశాసన్‌నగర్‌లోని ఐపీఎస్ అధికారి నివాసానికి చేరుకున్నారు. ముఠాలోని నలుగురు సభ్యులు ఎవరూ రాకుండా ఇంటి బయట కాపలా కాయగా, ముగ్గురు నిందితులు గోడ దూకి ఇంట్లోకి చొరబడ్డారు. ఆ సమయంలో ఇంట్లో ఒంటరిగా ఉన్న వినయ్‌రంజన్ భార్య తనూజారంజన్ (మృతురాలు) ఒక్కసారిగా నిద్రలేచి కేకలు వేయడానికి ప్రయత్నించింది.

హత్య మరియు దోపిడీ అనంతరం నిందితులు నేరుగా నాంపల్లి రైల్వేస్టేషన్‌కు చేరుకున్నారు. తెల్లవారుజామున వచ్చే తెలంగాణ ఎక్స్‌ప్రెస్ రైలు ఎక్కి కాజీపేట వరకు వెళ్లారు. అక్కడ రైలు దిగి, దోచుకున్న 23 తులాల బంగారాన్ని అందరూ సమానంగా పంచుకున్నారు. పోలీసులకు దొరకకుండా ఉండేందుకు మూడు వేర్వేరు బృందాలుగా విడిపోయి ముంబయి నగరానికి పారిపోయారు.