ప్రస్తుత వార్షిక ర్యాంకింగ్స్‌లో ఆస్ట్రేలియా జట్టు 131 పాయింట్లతో అజేయంగా నిలిచి తన నంబర్ వన్ స్థానాన్ని పదిలం చేసుకుంది. దక్షిణాఫ్రికా 119 పాయింట్లతో రెండో స్థానాన్ని దక్కించుకోగా, భారత్ 104 పాయింట్లతో మూడో స్థానానికి చేరుకుంది. గతంలో కంటే మెరుగైన ప్రదర్శనతో భారత్ ఇంగ్లాండ్‌ను వెనక్కి నెట్టి ఈ ఘనత సాధించడం విశేషం.

ఆస్ట్రేలియా – 131 పాయింట్లు

‘బజ్‌బాల్’ క్రికెట్ పేరుతో దూకుడైన ఆటతీరును ప్రదర్శిస్తున్న ఇంగ్లాండ్ (102 పాయింట్లు) ఈసారి నాలుగో స్థానానికి పడిపోయింది. న్యూజిలాండ్ ఐదో స్థానంలో కొనసాగుతోంది. ఉపఖండపు జట్లయిన పాకిస్థాన్ (89), శ్రీలంక (86) వరుసగా ఆరు, ఏడు స్థానాల్లో ఉన్నాయి. మొత్తం 12 జట్ల జాబితాలో అఫ్గానిస్థాన్ ఒక్క పాయింట్ కూడా సాధించలేక చివరి స్థానంలో నిలవడం గమనార్హం.

ప్రస్తుతం జరుగుతున్న ప్రపంచ టెస్టు ఛాంపియన్‌షిప్ (WTC) నాలుగో సీజన్‌లో భారత జట్టు క్లిష్ట పరిస్థితుల్లో ఉంది. హెడ్ కోచ్ గౌతమ్ గంభీర్, కెప్టెన్ శుభ్‌మన్ గిల్ నేతృత్వంలోని టీమ్ ఇండియా ప్రస్తుతం పాయింట్ల పట్టికలో ఆరో స్థానంలో ఉంది.

భారత్ ఈ ఏడాది ఆస్ట్రేలియా, శ్రీలంక, న్యూజిలాండ్‌తో కీలకమైన టెస్టు సిరీస్‌లు ఆడాల్సి ఉంది. డబ్ల్యూటీసీ ఫైనల్ రేసులో నిలవాలంటే టీమ్ ఇండియా ఈ మ్యాచ్‌ల్లో ఖచ్చితంగా విజయం సాధించాల్సి ఉంటుంది. కేవలం విజయాలే కాకుండా, పట్టికలో పైన ఉన్న జట్ల ఓటములపై కూడా భారత్ భవితవ్యం ఆధారపడి ఉంది. ఐసీసీ ర్యాంకుల్లో మెరుగుపడడం జట్టులో ఆత్మవిశ్వాసాన్ని నింపుతుందనడంలో సందేహం లేదు.