కేంద్ర రక్షణ మంత్రిత్వ శాఖ వెల్లడించిన వివరాల ప్రకారం, ఈ పరీక్షలో నిర్దేశించిన అన్ని లక్ష్యాలు విజయవంతంగా సాధించబడ్డాయి. క్షిపణి సుమారు 1,000 కిలోమీటర్ల దూరంలోని లక్ష్యాన్ని కచ్చితంగా ఛేదించింది. గతంలో ఎదురైన సాంకేతిక సమస్యలను కూడా ఈ పరీక్ష ద్వారా పూర్తిగా అధిగమించినట్లు అధికారులు తెలిపారు.
రక్షణ మంత్రిత్వ శాఖ ప్రకారం, ఈ క్షిపణి పూర్తిగా స్వదేశీ సాంకేతికతతో అభివృద్ధి చేయబడింది. డీఆర్డీవోకు చెందిన వివిధ ప్రయోగశాలలు, భారతీయ పరిశ్రమల భాగస్వామ్యంతో దీనిలోని అన్ని ఉపవ్యవస్థలను రూపొందించారు. బెంగళూరులోని ఏరోనాటికల్ డెవలప్మెంట్ ఎస్టాబ్లిష్మెంట్ (ADE) ఈ ప్రాజెక్టుకు ప్రధాన కేంద్రంగా పనిచేసింది.
BREAKING ⚡🇮🇳
DRDO successfully conducts test of Long Range Land Attack Cruise Missile (LRLACM) from Dr APJ Abdul Kalam Island off the coast of Odisha on 15th June 2026.1000-1500 km range, Subsonic & Sea skimming to evade enemy Radars.
— Vivek Singh (@VivekSi85847001) June 15, 2026
ఈ విజయానికి ముందు భారత్ అభివృద్ధి చేసిన ‘నిర్భయ్’ క్రూయిజ్ క్షిపణి పలు ప్రారంభ పరీక్షల్లో సవాళ్లను ఎదుర్కొంది. 2013, 2015, 2016, 2020 సంవత్సరాల్లో నిర్వహించిన కొన్ని ప్రయోగాల్లో సాంకేతిక లోపాలు తలెత్తడంతో ప్రాజెక్టు ఆశించిన స్థాయిలో ముందుకు సాగలేదు.
అయితే ఇప్పుడు అభివృద్ధి చేసిన LRLACM క్షిపణి, నిర్భయ్ ప్రాజెక్టుకు మరింత ఆధునిక రూపంగా భావిస్తున్నారు. దీనికి అధిక పరిధి, మెరుగైన సాంకేతిక సామర్థ్యాలు, అధునాతన నావిగేషన్ వ్యవస్థలను జోడించారు.
భారత్ భద్రతా అవసరాల దృష్ట్యా ఈ క్షిపణి ఎంతో ప్రాధాన్యం సంతరించుకుంది. ముఖ్యంగా ప్రాంతీయ భద్రతా సవాళ్లు పెరుగుతున్న నేపథ్యంలో, దీర్ఘదూర లక్ష్యాలను అత్యంత కచ్చితత్వంతో ఛేదించగల సామర్థ్యం భారత సైన్యానికి కీలక బలంగా మారనుంది.
ఈ క్షిపణి తక్కువ ఎత్తులో ప్రయాణించగలదు. దీంతో శత్రు రాడార్ వ్యవస్థలకు సులభంగా కనిపించకుండా లక్ష్యాన్ని చేరుకునే సామర్థ్యం కలిగి ఉంటుంది. సుమారు 500 కిలోగ్రాముల వార్హెడ్ను మోసుకెళ్లగల ఈ క్షిపణి లక్ష్యాన్ని సమర్థవంతంగా ధ్వంసం చేయగలదు.
అమెరికా వినియోగిస్తున్న ప్రసిద్ధ టొమాహాక్ క్రూయిజ్ మిసైల్కు సమానంగా ఈ క్షిపణిని పలువురు రక్షణ నిపుణులు అభివర్ణిస్తున్నారు. వివిధ ఎత్తులు, వేగాల్లో ప్రయాణిస్తూ లక్ష్యాన్ని చేరుకునే సామర్థ్యం దీనికి ప్రత్యేకత.
భారత సైన్యంలో అధికారికంగా ప్రవేశపెట్టే ముందు ఈ క్షిపణికి మరో రెండు అభివృద్ధి పరీక్షలు, అనంతరం రెండు యూజర్ ట్రయల్స్ నిర్వహించనున్నారు. వచ్చే రెండేళ్లలో ఈ ప్రక్రియ పూర్తయ్యే అవకాశం ఉందని అధికారులు తెలిపారు.
ఈ ప్రయోగాన్ని డీఆర్డీవో సీనియర్ శాస్త్రవేత్తలు, భారత నౌకాదళం, భారత వైమానిక దళం ప్రతినిధులు ప్రత్యక్షంగా వీక్షించారు. రక్షణ కార్యదర్శి, డీఆర్డీవో చైర్మన్ రాజేష్ కుమార్ సింగ్ కూడా ప్రయోగ ప్రక్రియను పర్యవేక్షించారు.
