టాస్ గెలిచి బ్యాటింగ్ ఎంచుకున్న దిల్లీ క్యాపిటల్స్‌కు ఆర్‌సీబీ బౌలర్లు చుక్కలు చూపించారు. ఇన్నింగ్స్ ఆరంభం నుంచే భువనేశ్వర్ కుమార్, జోష్ హేజిల్‌వుడ్ నిప్పులు చెరిగే బంతులతో విరుచుకుపడ్డారు. దీంతో దిల్లీ టాప్ ఆర్డర్ పేకమేడలా కూలిపోయింది. కేవలం 8 పరుగుల స్కోరు వద్దే 6 వికెట్లు కోల్పోయి దిల్లీ అత్యంత దయనీయ స్థితికి చేరుకుంది. సాహిల్ పరాఖ్, సమీర్ రిజ్వీ, అక్షర్ పటేల్ వంటి కీలక ఆటగాళ్లు పరుగుల ఖాతా తెరవకుండానే పెవిలియన్ చేరగా.. కేఎల్ రాహుల్ (1), నితీశ్‌ రాణా (1) ఇలా వచ్చి అలా వెళ్లిపోయారు. పవర్ ప్లే (6 ఓవర్లు) ముగిసేసరికి దిల్లీ స్కోరు కేవలం 13/6. ఐపీఎల్ చరిత్రలో పవర్ ప్లేలో నమోదైన అత్యల్ప స్కోరు ఇదే కావడం గమనార్హం.

చెత్త రికార్డు నుంచి తప్పించిన పొరెల్

ఒక దశలో ఐపీఎల్ చరిత్రలోనే అత్యల్ప స్కోరుకు ఆలౌట్ అవుతుందనుకున్న దిల్లీని అభిషేక్ పొరెల్ (30) ఆదుకున్నాడు. ఏడో స్థానంలో వచ్చి బాధ్యతాయుతంగా ఆడిన పొరెల్ జట్టు స్కోరును 75 పరుగులకు చేర్చాడు. డేవిడ్ మిల్లర్ (19), కైల్ జేమీసన్ (12) అతనికి సహకరించడంతో దిల్లీ గౌరవప్రదమైన స్కోరునైనా సాధించగలిగింది. చివరకు 16.3 ఓవర్లలో 75 పరుగుల వద్ద దిల్లీ ఇన్నింగ్స్ ముగిసింది.

బెంగళూరు బౌలర్లలో భువనేశ్వర్ కుమార్ అద్భుతమైన స్పెల్‌తో ఆకట్టుకున్నాడు. కేవలం 5 పరుగులు ఇచ్చి 3 వికెట్లు పడగొట్టి ప్రత్యర్థిని కోలుకోనివ్వలేదు. జోష్ హేజిల్‌వుడ్ 4 వికెట్లతో దిల్లీ వెన్నుముక విరిచాడు. రసిఖ్ సలామ్, సుయాశ్ శర్మ, కృనాల్ పాండ్య తలో వికెట్ సాధించి తమ వంతు పాత్ర పోషించారు.