ఈ సీజన్ ప్రారంభంలో పంజాబ్ కింగ్స్ అద్భుతమైన ఫామ్‌ను కనబరిచింది. ఆడిన మొదటి ఏడు మ్యాచ్‌ల్లోనూ విజయం సాధించి అజేయంగా నిలిచింది. ఒక దశలో ప్లేఆఫ్స్ చేరడమే కాకుండా, పాయింట్ల పట్టికలో అగ్రస్థానంలో నిలుస్తుందని అందరూ భావించారు. అయితే, మధ్య సీజన్‌లో జట్టు ఫామ్ ఒక్కసారిగా తలకిందులైంది. వరుసగా నాలుగు మ్యాచ్‌ల్లో ఓటమి పాలవ్వడంతో అభిమానుల్లో ఆందోళన మొదలైంది. ఈ ఫామ్ లేమిని సాకుగా చూపిస్తూ సోషల్ మీడియాలో కొన్ని తప్పుడు వార్తలు, కల్పిత కథనాలు ప్రచారంలోకి వచ్చాయి.

తమ జట్టుపై వస్తున్న తప్పుడు వార్తలపై పంజాబ్ కింగ్స్ ‘X’ (గతంలో ట్విట్టర్) వేదికగా స్పందిస్తూ.. కేవలం వ్యూస్ మరియు ఎంగేజ్‌మెంట్ కోసం “ఫేక్ స్టోరీస్” సృష్టించవద్దని కోరింది. ముఖ్యంగా క్రీడా జర్నలిస్టులు వాస్తవాలను సరిచూసుకోకుండా వార్తలను ప్రచురించవద్దని తొలుత ఘాటుగా పోస్ట్ చేసింది. “విమర్శలు, సరదా సంభాషణలు, అభిప్రాయాలు క్రీడలో భాగమే. కానీ చౌకబారు ప్రచారం కోసం కల్పిత గాథలను సృష్టించడం సరికాదు” అని పేర్కొంది. అయితే, కొద్దిసేపటికే ఆ పోస్ట్‌ను తొలగించి, “క్రీడా జర్నలిస్టులు” అనే పదాన్ని తీసివేసి సవరించిన కొత్త పోస్ట్‌ను పెట్టింది.

జట్టు సహ యజమాని ప్రీతి జింటా కూడా ఈ విషయంపై గట్టిగానే స్పందించారు. “విమర్శకు మరియు ఉద్దేశపూర్వకంగా చేసే దుష్ప్రచారానికి చాలా తేడా ఉంది. ఆటపై ఆరోగ్యకరమైన చర్చను మేము ఎప్పుడూ ఆహ్వానిస్తాం. కానీ వ్యక్తులను, జట్టును లేదా బ్రాండ్‌ను దెబ్బతీసేలా తప్పుడు కథనాలను ప్రచారం చేస్తే ఊరుకునేది లేదు” అని ఆమె స్పష్టం చేశారు. మీడియా నిపుణులు మరియు ధృవీకరించబడిన ఖాతాలు కలిగిన వారు సమాచారాన్ని షేర్ చేసే ముందు బాధ్యతాయుతంగా వ్యవహరించాలని ఆమె కోరారు.