ఒంటరి తోడేలు కథ: ఈ సినిమాను ఒక పవర్‌ఫుల్ ‘సైకలాజికల్ యాక్షన్ థ్రిల్లర్’గా రూపొందిస్తున్నారు. ఇందులో రామ్ ‘వీర’ అనే విభిన్నమైన పాత్రలో కనిపించనున్నారు. తాజాగా విడుదలైన పోస్టర్‌లో రామ్ లెదర్ జాకెట్ ధరించి, వెనక వైపు నుంచి స్టైలిష్‌గా కనిపిస్తూ ప్రేక్షకుల్లో ఆసక్తిని రేకెత్తిస్తున్నారు. “ఒంటరి తోడేలు కథ” (A Lone Wolf’s Tale) అనే ట్యాగ్‌లైన్ ఈ సినిమా ఇంటెన్సిటీని తెలియజేస్తోంది. ఈ కథను కూడా రామ్ స్వయంగా సిద్ధం చేసుకోవడం ఆయన సృజనాత్మకతకు నిదర్శనం.

ఈ చిత్రాన్ని ‘రాపో సినిమాటిక్స్’ (RaPO Cinematics) బ్యానర్‌పై కృష్ణ పోతినేని నిర్మిస్తున్నారు. జూన్ నెలలో ఈ సినిమా రెగ్యులర్ చిత్రీకరణ ప్రారంభం కానుంది. అన్ని కార్యక్రమాలను పూర్తి చేసి, ఈ ఏడాది డిసెంబర్‌లో సినిమాను థియేటర్లలోకి తీసుకురావాలని చిత్ర బృందం లక్ష్యంగా పెట్టుకుంది. రామ్ పోతినేని గత రెండు దశాబ్దాలుగా ‘దేవదాసు’ నుంచి ‘ఇస్మార్ట్ శంకర్’ వరకు ఎన్నో విభిన్న పాత్రలతో మెప్పించారు. ఇప్పుడు డైరెక్టర్‌గా ఆయన ప్రయాణం ఎలా ఉండబోతుందో తెలియాలంటే మరికొంత కాలం వేచి చూడాల్సిందే.