విమానాల్లో ఈ-సిగరెట్లు తాగడం ఏవియేషన్ నిబంధనలకు పూర్తిగా విరుద్ధం. ప్రయాణికుల భద్రత దృష్ట్యా ఇలాంటి చర్యలను విమానయాన సంస్థలు తీవ్రంగా పరిగణిస్తాయి. చాహల్ లాంటి సీనియర్ భారత క్రికెటర్ ఇంత బాధ్యతారాహిత్యంగా వ్యవహరించడంపై సర్వత్రా విమర్శలు వస్తున్నాయి. అయితే అతడు నిజంగానే పొగ పీల్చాడా, లేక సరదాగా అలా నటించాడా అనే చర్చ కూడా ఆన్‌లైన్‌లో నడుస్తోంది.

ఈ తాజా ఘటనపై భారత క్రికెట్ నియంత్రణ మండలి (బీసీసీఐ) ఇంకా అధికారికంగా స్పందించలేదు. కొద్ది రోజుల క్రితం ముల్లాన్‌పూర్‌లో పంజాబ్‌తో జరిగిన మ్యాచ్ సందర్భంగా రియాన్ పరాగ్ డ్రెస్సింగ్ రూమ్‌లో వేపింగ్ చేస్తూ దొరికిపోయాడు. తన తప్పును అంగీకరించిన పరాగ్‌కు బీసీసీఐ మ్యాచ్ ఫీజులో 25 శాతం భారీ జరిమానా విధించింది.

ఆటగాళ్ల ప్రవర్తనా నియమావళి విషయంలో బీసీసీఐ ఎంతో కఠినంగా వ్యవహరిస్తుంది. పదే పదే ఇలాంటి ఘటనలు పునరావృతం కావడం లీగ్ ప్రతిష్టను దెబ్బతీసే ప్రమాదం ఉంది. తాజా ఉదంతంపై బోర్డు విచారణ జరిపి కఠిన చర్యలు తీసుకునే అవకాశం ఉన్నట్లు క్రీడా వర్గాల్లో ప్రచారం జరుగుతోంది.