కథ విషయానికి వస్తే.. చిన్నప్పుడే తల్లిదండ్రులను కోల్పోయిన విజ్జి అలియాస్ మమితా బైజును దళపతి వెట్రి కొండన్ అలియాస్ విజయ్ దళపతి ఎంతో ప్రేమగా పెంచుతాడు. ఆమెను ఆర్మీ అధికారిగా చూడాలని కలలు కంటాడు. కానీ విజ్జి భయాలతో పాటు మానసిక సమస్యల కారణంగా ఆ దిశగా వెళ్లడానికి ఆసక్తి చూపదు. ఇదే సమయంలో జాన్ హిమ్లర్ అలియాస్ బాబీ డియోల్ అనే ప్రమాదకర వ్యక్తి, రాజకీయ నాయకుడు రోజా రంగసామి అలియాస్ ప్రకాష్ రాజ్‌తో కలిసి దేశంలో మత ఘర్షణలు రేపి అల్లకల్లోలం సృష్టించే కుట్ర పన్నుతాడు. ఈ కుట్రను దళపతి ఎలా అడ్డుకున్నాడు? విజ్జిలోని భయాన్ని ఎలా పోగొట్టాడు? అన్నదే సినిమా ప్రధాన కథ.

నటన పరంగా విజయ్ మరోసారి తన స్టార్‌డమ్‌ను చాటుకున్నారు. యాక్షన్ సన్నివేశాలు, మాస్ ఎలివేషన్లు, స్టైలిష్ లుక్ అభిమానులను ఆకట్టుకుంటాయి. మమితా బైజుతో ఆయన మధ్య వచ్చే భావోద్వేగ సన్నివేశాలు బాగా పండాయి. అయితే పూజా హెగ్డే పాత్రకు పెద్దగా ప్రాధాన్యం లేదు. బాబీ డియోల్, ప్రకాష్ రాజ్ వంటి అనుభవజ్ఞులైన నటులకు కూడా బలమైన పాత్రలు రాలేదు. నాజర్, ప్రియమణి, రేవతి, గౌతమ్ మీనన్ వంటి నటులు ఉన్నప్పటికీ వారి పాత్రలు గుర్తుండిపోయేలా లేవు.

దర్శకుడు హెచ్. వినోత్ భగవంత్ కేసరి కథను భారీ యాక్షన్ నేపథ్యంలో చూపించే ప్రయత్నం చేశారు. కానీ కథలో చేసిన మార్పులు ఆశించిన స్థాయిలో ప్రభావం చూపలేదు. ముఖ్యంగా రాజకీయ అంశాలను కథలో బలవంతంగా జోడించడం వల్ల సినిమా అసలు భావోద్వేగం తగ్గిపోయింది. విలన్ ట్రాక్ కూడా కొత్తదనం లేకుండా సాగుతుంది. క్లైమాక్స్‌లో వచ్చే యాక్షన్ ఎపిసోడ్లు, విజువల్ ఎఫెక్ట్స్ కూడా పెద్దగా ఆకట్టుకోవు. మూడు గంటలకు పైగా నిడివి ఉండటంతో సినిమా కొన్ని చోట్ల నెమ్మదిగా సాగిన భావన కలుగుతుంది.

సాంకేతికంగా చూస్తే సినిమాటోగ్రఫీ బాగానే ఉన్నా, విజువల్ ఎఫెక్ట్స్ మాత్రం నిరాశపరుస్తాయి. అనిరుధ్ సంగీతం నుంచి అభిమానులు ఆశించిన స్థాయి బ్యాక్‌గ్రౌండ్ స్కోర్ వినిపించదు. కొన్ని పాటలు మాత్రమే గుర్తుండిపోతాయి. భారీ బడ్జెట్‌తో రూపొందించినా ఆ గ్రాండియర్ తెరపై పూర్తిగా కనిపించలేదనే భావన కలుగుతుంది.

మొత్తంగా చూస్తే ‘జన నాయకుడు’ విజయ్ అభిమానులకు ఆయన స్క్రీన్ ప్రెజెన్స్, మాస్ ఎలివేషన్ల కారణంగా నచ్చే అవకాశం ఉంది. అయితే ఇప్పటికే ‘భగవంత్ కేసరి’ చూసిన తెలుగు ప్రేక్షకులకు ఈ సినిమా పెద్దగా కొత్త అనుభూతిని ఇవ్వదు. బలమైన కథనం, కొత్తదనం ఆశించే వారికి ఇది నిరాశ కలిగించే అవకాశముంది. విజయ్ నటన ప్రధాన ఆకర్షణగా నిలిచింది.

రేటింగ్: 2.75