మన్మోహన్ సింగ్ ప్రధానిగా ఉన్న సమయంలో 2005లో ఒడిశాలోని తలబిరా-2 బొగ్గు బ్లాక్‌ను హిందాల్కో సంస్థకు కేటాయించారు. అప్పట్లో బొగ్గు శాఖ కూడా ఆయన వద్దే ఉండటంతో విపక్షాలు దీనిపై పెద్ద ఎత్తున ఆరోపణలు చేశాయి. దీనిపై విచారణ జరిపిన సీబీఐ, మన్మోహన్ ప్రమేయంపై ఎలాంటి ఆధారాలు లేవని తేల్చింది. కానీ 2015లో కింది కోర్టు ఆ రిపోర్టును కాదని, కుట్ర, నమ్మక ద్రోహం కింద ఆయనకు సమన్లు జారీ చేసింది. వెంటనే స్పందించిన మన్మోహన్ సింగ్ సుప్రీంకోర్టును ఆశ్రయించగా, ఆ సమన్లపై స్టే విధించింది. అప్పటి నుంచి పెండింగ్‌లో ఉన్న ఈ కేసుపై తాజాగా తీర్పు వెలువరించింది.

వాస్తవానికి మన్మోహన్ సింగ్ 2024 డిసెంబర్‌లో కన్నుమూశారు. అయితే, ఆయన మరణించినప్పటికీ ఈ కేసు చట్టబద్ధతను తేల్చాలని భావించిన సుప్రీంకోర్టు ఈ చారిత్రక తీర్పు ఇచ్చింది. ఈ తీర్పు ద్వారా మన్మోహన్ సింగ్ వ్యక్తిగత నిజాయితీ మరోసారి రుజువైందని కాంగ్రెస్ వర్గాలు హర్షం వ్యక్తం చేస్తున్నాయి. కింది కోర్టులు దర్యాప్తు సంస్థల నిర్ణయాలతో విభేదించవచ్చని, కానీ దానికి సరైన న్యాయపరమైన కారణాలు ఉండాలని సుప్రీంకోర్టు ఈ సందర్భంగా స్పష్టం చేసింది. ఈ తీర్పుతో యూపీఏ హయాంలో దేశ రాజకీయాలను కుదిపేసిన బొగ్గు కుంభకోణం వివాదంలో ఒక కీలక అధ్యాయం ముగిసినట్లయింది.