Last Updated:
సోమవారం నాటి షెడ్యూల్లో కొంత సమయం ఖాళీ దొరకడంతో, ఈ గ్యాప్ను ఆగ్రాలోని సాంస్కృతిక ప్రదేశాలను సందర్శించడానికి ఉపయోగించుకున్నట్లు ఆయన వెల్లడించారు.
Marco Rubio: భారత పర్యటనలో ఉన్న అమెరికా విదేశాంగ మంత్రి (US Secretary of State) మార్కో రూబియో సోమవారం ఉదయం తన భార్య జీనెట్తో కలిసి ప్రపంచ వింతల్లో ఒకటైన చారిత్రాత్మక తాజ్ మహల్ను సందర్శించారు. తీవ్రమైన ఎండలు ఉన్నప్పటికీ, వారు ఈ ప్రేమ మందిరం వద్ద కాసేపు గడిపి, ఇక్కడి శిల్పకళను అభినందించారు. ఈ సందర్భంగా భారతదేశ సంస్కృతి పట్ల ఆయన ప్రత్యేక గౌరవాన్ని చాటుకున్నారు.
తాజ్ మహల్ సందర్శన అనంతరం మార్కో రూబియో విలేకరులతో మాట్లాడుతూ సరదాగా వ్యాఖ్యలు చేశారు. “నేను ఇంతకుముందు ఎప్పుడూ ఇక్కడికి రాలేదు. నాకు తెలిసిన ఒకే ఒక్క తాజ్ మహల్.. గతంలో న్యూజెర్సీ (అట్లాంటిక్ సిటీ)లో మా ప్రెసిడెంట్ డొనాల్డ్ ట్రంప్కు ఉండే క్యాసినో (తాజ్ మహల్ క్యాసినో) మాత్రమే” అంటూ నవ్వులు పూయించారు.
ఆ తర్వాత ఆయన తీవ్ర గంభీరంగా మాట్లాడుతూ.. “ఇది ప్రపంచ వింతల్లో ఒకటి. మనం ఏ దేశాన్ని సందర్శించినా, అక్కడి సంస్కృతికి మరియు చరిత్రకు గౌరవం ఇవ్వడం చాలా ముఖ్యం. భారతదేశం చాలా పెద్ద దేశం, ఇక్కడ ఎంతో వైవిధ్యం, అద్భుతమైన చరిత్ర ఉన్నాయి. ఈ దేశానికి ఐకానిక్గా నిలిచే తాజ్ మహల్ను చూడటం, ఇక్కడి సంస్కృతికి గౌరవం తెలపడం మంచి అవకాశంగా భావిస్తున్నాను” అని రూబియో పేర్కొన్నారు.
నిజానికి మంగళవారం ఢిల్లీలో జరగబోయే ‘క్వాడ్’ (Quad) దేశాల విదేశాంగ మంత్రుల సమావేశంలో పాల్గొనడానికి మార్కో రూబియో భారత్కు వచ్చారు. అయితే, సోమవారం నాటి షెడ్యూల్లో కొంత సమయం ఖాళీ దొరకడంతో, ఈ గ్యాప్ను ఆగ్రాలోని సాంస్కృతిక ప్రదేశాలను సందర్శించడానికి ఉపయోగించుకున్నట్లు ఆయన వెల్లడించారు.
అమెరికా రాయబారి సెర్గియో గోర్ కూడా ఈ పర్యటనలో రూబియో దంపతులతో కలిసి పాల్గొన్నారు. తాజ్ మహల్ సందర్శన ముగిసిన తర్వాత మార్కో రూబియో అక్కడి విజిటర్స్ బుక్లో.. “ప్రపంచంలోని అత్యంత విలువైన సంపదల్లో ఒకటైన ఈ అద్భుతాన్ని సందర్శించేందుకు మాకు అనుమతించినందుకు ధన్యవాదాలు” అని రాసి తన సంతకాన్ని ఉంచారు.
ఈ పర్యటన నిమిత్తం ఆగ్రాలో భారీ భద్రతా ఏర్పాట్లు చేశారు. రూబియో దంపతులు తాజ్ మహల్ ప్రాంగణంలోని ఐకానిక్ బెంచ్పై కూర్చుని ప్రత్యేకంగా ఫోటోలు దిగారు. ఇక్కడి నుంచి వారు జైపూర్ పర్యటన ముగించుకుని, మంగళవారం నాటి క్వాడ్ సమిట్ కోసం తిరిగి ఢిల్లీ చేరుకోనున్నారు.
Click here to add News18 as your preferred news source on Google. బ్రేకింగ్ న్యూస్, రాజకీయాలు, దేశంలోని అన్ని రాష్ట్రాల్లోని ముఖ్యమైన వార్తలు, విశ్లేషణ, కేంద్ర ప్రభుత్వ పథకాలకు సంబంధించిన స్టోరీలను న్యూస్18 తెలుగు నేషనల్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
