జాతీయ పతాకావిష్కరణ అనంతరం తెలంగాణ రాష్ట్ర సాధన కోసం ప్రాణత్యాగాలు చేసిన అమరవీరులను స్మరించుకుంటూ ఆయన ఘన నివాళులు అర్పించారు. ప్రత్యేక రాష్ట్రం కోసం ఎన్నో సంవత్సరాల పాటు జరిగిన ఉద్యమంలో విద్యార్థులు, యువత, ఉద్యోగులు, ప్రజాసంఘాలు పోషించిన పాత్రను గుర్తు చేసుకున్నారు. వేలాది మంది ఉద్యమకారుల త్యాగాలు, ప్రజల ఆకాంక్షలు, నిరంతర పోరాట ఫలితంగానే తెలంగాణ రాష్ట్రం ఏర్పడిందని ఆయన పేర్కొన్నారు.

అనంతరం మాట్లాడుతూ తెలంగాణ రాష్ట్రం ఏర్పడిన తర్వాత హైదరాబాద్ నగరం వేగంగా అభివృద్ధి చెందుతోందని, ఆ అభివృద్ధిలో హైదరాబాద్ మెట్రో రైల్ కీలక పాత్ర పోషిస్తోందని తెలిపారు. నగర ప్రజలకు సురక్షితమైన, వేగవంతమైన, కాలుష్యరహిత ప్రజా రవాణా సేవలను అందించడంలో మెట్రో రైల్ విశేష సేవలు అందిస్తోందన్నారు. రోజురోజుకు పెరుగుతున్న ప్రయాణికుల అవసరాలను దృష్టిలో ఉంచుకుని సేవలను మరింత మెరుగుపరుస్తున్నామని చెప్పారు.

గౌరవ ముఖ్యమంత్రి దార్శనికతకు అనుగుణంగా హైదరాబాద్ మెట్రో రైల్ నెట్‌వర్క్‌ను మరింత విస్తరించేందుకు అధికారులు, ఉద్యోగులు సమష్టిగా కృషి చేయాలని శివేంద్ర ప్రతాప్ పిలుపునిచ్చారు. భవిష్యత్ తరాల అవసరాలకు అనుగుణంగా మెట్రో విస్తరణ ప్రాజెక్టులను వేగవంతం చేయడంతో పాటు ప్రయాణికులకు అత్యుత్తమ సేవలు అందించేందుకు కట్టుబడి ఉండాలని సూచించారు.

తెలంగాణ అభివృద్ధి ప్రయాణంలో భాగస్వాములుగా ఉండటం ప్రతి ఉద్యోగికి గర్వకారణమని పేర్కొన్న ఆయన, ప్రజాసేవను ప్రధాన లక్ష్యంగా పెట్టుకుని విధులు నిర్వహించాలని ఆకాంక్షించారు. సంస్థ అభివృద్ధి, నగర ప్రగతి, ప్రజల సంక్షేమం పరస్పరం అనుసంధానమై ఉన్నాయని తెలిపారు.

ఈ కార్యక్రమంలో హైదరాబాద్ మెట్రో రైల్‌కు చెందిన సీనియర్ అధికారులు, వివిధ విభాగాల ఉద్యోగులు, సిబ్బంది పెద్ద సంఖ్యలో పాల్గొన్నారు. కార్యక్రమం అనంతరం ఒకరికొకరు తెలంగాణ ఆవిర్భావ దినోత్సవ శుభాకాంక్షలు తెలియజేసుకుంటూ రాష్ట్ర అభివృద్ధికి తమ వంతు సహకారం అందించేందుకు ప్రతిజ్ఞ చేశారు. తెలంగాణ ఆవిర్భావ దినోత్సవ వేడుకలు ఉత్సాహభరిత వాతావరణంలో ముగిశాయి.