ఈ మిల్క్ ఏటీఎంలో నింపే పాలకు సంబంధించి కఠినమైన ప్రమాణాలు పాటిస్తున్నారు. పాలను సేకరించిన వెంటనే ల్యాబ్‌లో 16 రకాల నాణ్యతా పరీక్షలు నిర్వహిస్తారు. ఎటువంటి క్రీమ్ కలపని స్వచ్ఛమైన ఆవు పాలను ఏటీఎంలో నింపుతారు. రోజూ కొత్త పాలను మాత్రమే ఇందులో పోస్తారు. విదేశాల నుంచి దిగుమతి చేసుకున్న ఈ అత్యాధునిక ఏటీఎం మెషిన్ సామర్థ్యం 200 లీటర్లు. పాలను 5 నుంచి 6 గంటల పాటు నిరంతరంగా చల్లగా ఉంచే ప్రత్యేక శీతలీకరణ వ్యవస్థ ఇందులో ఉంది. ఈ మెషిన్ పూర్తిగా స్థానిక తమిళ భాషలో పనిచేసేలా రూపొందించారు. దీంతో చదువురాని సామాన్యులు కూడా ఇతరుల సహాయం అవసరం లేకుండా చాలా సులభంగా పాలు తీసుకునే అవకాశం కలుగుతోంది.

ఈ మిల్క్ ఏటీఎం సేవలకు ముఖ్యంగా రాత్రి వేళల్లో అనూహ్య ఆదరణ లభిస్తోంది. ఉదయం కన్నా సాయంత్రం 6 గంటల నుంచి రాత్రి 11 గంటల మధ్య జనం ఎక్కువగా వస్తున్నారు. సోషల్ మీడియాలో ఈ ఏటీఎం వీడియో వైరల్ కావడంతో మధురై వ్యాప్తంగా మరో 150 చోట్ల ఇలాంటి కేంద్రాలు ఏర్పాటు చేయాలనే డిమాండ్లు వస్తున్నాయి. త్వరలో నగరంలోని నాలుగు దిక్కులతో పాటు ప్రభుత్వ ఆస్పత్రి వద్ద కూడా వీటిని ఏర్పాటు చేసేందుకు సన్నాహాలు చేస్తున్నారు. ప్రస్తుతం లీటరు ఆవు పాలను రూ.60 చొప్పున విక్రయిస్తున్నారు. ప్రారంభించిన తొలిరోజు 30 లీటర్లు, రెండో రోజు ఏకంగా 90 లీటర్ల పాలు అమ్ముడయ్యాయి. రోజుకు కనీసం 150 లీటర్లు అమ్ముడైతే కానీ నిర్వహణ ఖర్చులు వెళ్లవని, కేవలం లాభాపేక్షతో కాకుండా ప్రజలకు స్వచ్ఛమైన పాలు అందించాలనే ఈ ప్రాజెక్ట్ చేపట్టామని నిర్వాహకుడు తెలిపాడు. అర్ధరాత్రి వేళ కూడా నాణ్యమైన పాలు దొరకడంపై మధురై వాసులు హర్షం వ్యక్తం చేస్తున్నారు.