Last Updated:
అదిరిపోయే గిఫ్ట్.. బ్యాంక్ ఖాతాల్లోకి ఒకేసారి రూ.లక్షా 10 వేలు. పూర్తి వివరాలు తెలుసుకోండి.
సింగరేణి కార్మికులకు దీపావళి పండుగ ముందుగానే వచ్చింది. బొగ్గు బావుల్లో శ్రమిస్తున్న ప్రతి కార్మికుడి మోమున చిరునవ్వులు పూయించే శుభవార్త వెలువడింది. ఈ ఏడాది దీపావళి కానుకగా సింగరేణి కార్మికులకు భారీ మొత్తంలో పీఎల్‌ఆర్ బోనస్ అందనుంది. దేశవ్యాప్తంగా ఉన్న బొగ్గు పరిశ్రమ కార్మికులతో సమానంగా సింగరేణి శ్రామికులకు కూడా ఈ ప్రతిష్టాత్మక బహుమతి లభించనుంది. కష్టానికి తగిన ప్రతిఫలం దక్కడంతో కార్మిక లోకంలో పండుగ వాతావరణం నెలకొంది. ఈ ప్రకటనతో సింగరేణి వ్యాప్తంగా సంబరాలు అంబరాన్ని తాకుతున్నాయి.
కోల్‌కతా వేదికగా శనివారం జరిగిన జేబీసీసీఐ అపెక్స్‌ జేసీసీ సమావేశంలో పీఎల్‌ఆర్ బోనస్‌‌పై కీలక నిర్ణయం తీసుకున్నారు. 2025–26 ఆర్థిక సంవత్సరానికి సంబంధించిన పనితీరు ఆధారిత బహుమతి (పీఎల్‌ఆర్) పంపిణీపై ఈ భేటీలో తీవ్రంగా చర్చించారు. సుదీర్ఘ మంతనాల అనంతరం సింగరేణి కార్మికులకు రూ.1,10,250 బోనస్ చెల్లించేందుకు అన్ని వర్గాలు అంగీకారం తెలిపాయి. సింగరేణి కాలరీస్‌ వర్కర్స్‌ యూనియన్‌ అధ్యక్షుడు వాసిరెడ్డి సీతారామయ్య ఈ విషయన్ని అధికారికంగా వెల్లడించారు. గతేడాది కోల్‌ఇండియా అలాగే అనుబంధ సంస్థలతో పాటు సింగరేణి కార్మికులకు రూ.1,03,000 పీఎల్‌ఆర్ మాత్రమే అందించారు.
గతేడాదితో పోలిస్తే ఈసారి బోనస్ మొత్తం పెరగడంతో కార్మికుల్లో అనూహ్య స్పందన వ్యక్తమవుతోంది. కోల్‌కతాలో జరిగిన సమావేశంలో యాజమాన్య ప్రతినిధులు, వివిధ కార్మిక సంఘాల నేతలు పాల్గొని పలు అంశాలపై చర్చించారు. వృత్తిపరమైన భద్రత, కార్మికుల ఆరోగ్య రక్షణ చర్యలపై తొలుత సవివరమైన చర్చ జరిగింది. భోజన విరామం ముగిసిన తర్వాత ప్రధానంగా పీఎల్‌ఆర్ అంశంపై చర్చలు ఊపందుకున్నాయి. కార్మిక సంఘాల ప్రతినిధులు మొదట ఒక్కో కార్మికుడికి రూ.1.20 లక్షలు ఇవ్వాలని గట్టిగా డిమాండ్ చేశారు.
కార్మిక సంఘాల డిమాండ్‌పై యాజమాన్యం తమ సొంత ప్రతిపాదనలను తెరపైకి తెచ్చి చర్చలను కొనసాగించింది. ఇరువర్గాల మధ్య జరిగిన ఒప్పందాలు, ఆర్థిక పరిస్థితుల బేరీజు తర్వాత తుది నిర్ణయానికి వచ్చారు. ఎట్టకేలకు అందరి సమ్మతితో రూ.1,10,250 పీఎల్‌ఆర్ ఇవ్వాలనే అంశంపై సంపూర్ణ ఏకాభిప్రాయం కుదిరింది. ఈ చారిత్రాత్మక నిర్ణయం పట్ల కార్మిక సంఘాల నేతలు హర్షం వ్యక్తం చేస్తూ ప్రకటన విడుదల చేశారు. కార్మికుల కష్టాన్ని గుర్తించి ఇంతటి మొత్తం ఖరారు చేయడం పట్ల సర్వత్రా ప్రశంసలు వెల్లువెత్తుతున్నాయి.
ఈ భారీ బోనస్‌కు సంబంధించిన అధికారిక ఉత్తర్వులు వెలువడాల్సి ఉంది. పీఎల్‌ఆర్ నగదు కార్మికుల ఖాతాల్లో జమయ్యే తేదీని సింగరేణి యాజమాన్యం త్వరలోనే ప్రకటించనుంది. దీపావళికి ముందే ఈ మొత్తం చేతికి అందనుండటంతో కార్మిక కుటుంబాలు ఆనందంలో మునిగిపోయాయి. పండుగ ఖర్చులకు ఎటువంటి ఆర్థిక ఇబ్బందులు లేకుండా ఈ కానుక ఎంతో ఉపయోగపడుతుందని కార్మికులు సంతోషం వ్యక్తం చేస్తున్నారు. బొగ్గు వెలికితీతలో నిరంతరం శ్రమిస్తున్న తమ చెమట చుక్కలకు దక్కిన నిజమైన గౌరవంగా ఈ బోనస్‌ను భావిస్తున్నారు.
