నాగ్ అశ్విన్ తన అధికారిక ఇన్‌స్టాగ్రామ్ ఖాతాలో భార్య ప్రియాంక దత్, కుమారుడు రిషితో కలిసి దిగిన ఓ అందమైన కుటుంబ ఫొటోను షేర్ చేశారు. తెలుపు రంగు దుస్తుల్లో కనిపించిన ఈ కుటుంబం ఎంతో ఆహ్లాదకరంగా కనిపించింది. ఆ ఫొటోలో ప్రియాంక దత్ బేబీ బంప్ స్పష్టంగా కనిపించడంతో, ఈ జంట రెండోసారి తల్లిదండ్రులు కాబోతున్నారనే విషయం అభిమానులకు అర్థమైంది. ఈ పోస్టుకు నాగ్ అశ్విన్ ఎలాంటి పెద్ద క్యాప్షన్ ఇవ్వకుండా కేవలం రెడ్ హార్ట్, దృష్టి దోషం దూరం చేసే ఎమోజీలను మాత్రమే జత చేశారు.

ఈ ఫొటో సోషల్ మీడియాలో వైరల్ అవుతుండగా, అభిమానులు, సినీ ప్రముఖులు నాగ్ అశ్విన్ దంపతులకు శుభాకాంక్షలు తెలియజేస్తున్నారు. “మరోసారి అభినందనలు”, “మీ కుటుంబం ఎల్లప్పుడూ ఆనందంగా ఉండాలి”, “ఇప్పుడు మళ్లీ ఇదే ఫొటోను కొత్త బేబీతో రీక్రియేట్ చేయాల్సిందే” అంటూ అభిమానులు కామెంట్లు చేస్తున్నారు. మరికొందరు “దేవి దుర్గమ్మ ఆశీస్సులు మీ కుటుంబంపై ఉండాలి” అంటూ శుభాకాంక్షలు తెలిపారు.

ఇక నాగ్ అశ్విన్ సినీ కెరీర్ విషయానికి వస్తే, ప్రస్తుతం ఆయన అత్యంత ప్రతిష్ఠాత్మకంగా తెరకెక్కుతున్న ‘కల్కి 2898 AD’ సీక్వెల్ పనుల్లో బిజీగా ఉన్నారు. ప్రభాస్ హీరోగా రూపొందుతున్న ఈ చిత్రం భారతీయ సినీ పరిశ్రమలోనే అత్యంత భారీ ప్రాజెక్ట్‌లలో ఒకటిగా నిలిచింది. ఇటీవల జరిగిన ‘సింగ్ గీతమ్’ సినిమా ప్రమోషన్స్ సందర్భంగా నాగ్ అశ్విన్ ‘కల్కి 2’ గురించి కీలక అప్‌డేట్ కూడా ఇచ్చారు.

“ఆగస్టు లేదా సెప్టెంబర్ నెలలో రెగ్యులర్ షూటింగ్ ప్రారంభించే అవకాశం ఉంది. ఇప్పటికే కథా రచన పూర్తయింది. ప్రీ-ప్రొడక్షన్ పనులు కూడా ఎక్కువగా ముగిశాయి. అందువల్ల ఈసారి చిత్రీకరణ వేగంగా పూర్తయ్యే అవకాశం ఉంది” అని నాగ్ అశ్విన్ వెల్లడించారు. దీంతో ‘కల్కి 2’ కోసం ఆసక్తిగా ఎదురుచూస్తున్న అభిమానుల్లో మరింత ఉత్సాహం నెలకొంది.

అయితే, ‘కల్కి 2898 AD’ సీక్వెల్‌కు సంబంధించిన మరో అంశం ఇప్పటికీ చర్చనీయాంశంగానే ఉంది. గత ఏడాది సెప్టెంబర్‌లో చిత్ర బృందం అధికారికంగా ప్రకటించిన ప్రకారం, బాలీవుడ్ స్టార్ హీరోయిన్ దీపికా పదుకొణె ఈ ప్రాజెక్ట్ నుంచి తప్పుకున్నట్లు వెల్లడించారు. “కల్కి లాంటి భారీ ప్రాజెక్ట్‌కు పూర్తి స్థాయి కమిట్‌మెంట్ అవసరం. పరస్పర అవగాహనతోనే ఈ నిర్ణయం తీసుకున్నాం” అని నిర్మాతలు అప్పట్లో ప్రకటించారు.

దీంతో దీపికా స్థానంలో ఎవరిని తీసుకోబోతున్నారనే విషయంపై ఇప్పటికీ అధికారిక ప్రకటన వెలువడలేదు. ఈ పాత్రలో ఎవరు నటిస్తారనే దానిపై అభిమానులు ఆసక్తిగా ఎదురుచూస్తున్నారు. ఒకవైపు ‘కల్కి 2’పై అంచనాలు పెరుగుతుండగా, మరోవైపు నాగ్ అశ్విన్ వ్యక్తిగత జీవితంలో కూడా ఆనందాలు వెల్లివిరుస్తుండటం అభిమానులను సంతోషానికి గురి చేస్తోంది. ప్రస్తుతం సోషల్ మీడియాలో నాగ్ అశ్విన్ కుటుంబ ఫొటో వైరల్ అవుతుండగా, సినీ అభిమానులు ఈ స్టార్ డైరెక్టర్‌కు శుభాకాంక్షల వర్షం కురిపిస్తున్నారు.