Last Updated:
PM Modi Kanpur visit: కాన్పూర్లో పర్యటించనున్న ప్రధాని మోదీ, సుమారు రూ. 15,000 కోట్ల భారీ వ్యయంతో పూర్తయిన, ప్రారంభం కానున్న 5 మెగా ప్రాజెక్టులను ప్రజలకు అంకితం చేయనున్నారు.
ఉత్తరప్రదేశ్ రాష్ట్రంలోని ప్రముఖ పారిశ్రామిక నగరం కాన్పూర్ అభివృద్ధిలో సరికొత్త అధ్యాయం ప్రారంభం కాబోతోంది. ప్రధానమంత్రి నరేంద్ర మోదీ కాన్పూర్ పర్యటన ఖరారైన తరుణంలో, ఆ నగర అభివృద్ధి రూపురేఖలు మారనున్నాయి. జూన్ చివరి వారంలో లేదా జూలై మొదటి వారంలో కాన్పూర్లో పర్యటించనున్న ప్రధాని మోదీ, సుమారు రూ. 15,000 కోట్ల భారీ వ్యయంతో పూర్తయిన, ప్రారంభం కానున్న 5 మెగా ప్రాజెక్టులను ప్రజలకు అంకితం చేయనున్నారు. ఈ పర్యటనకు సంబంధించిన పరిపాలనా, భద్రతా ఏర్పాట్లు ఇప్పటికే తుది దశకు చేరుకున్నాయి. ఉత్తరప్రదేశ్ ముఖ్యమంత్రి యోగి ఆదిత్యనాథ్ స్వయంగా ఈ ఏర్పాట్లను ఎప్పటికప్పుడు పర్యవేక్షిస్తున్నారని ఈటీవీ భారత్ వార్తా సంస్థ రిపోర్ట్ చేసింది. గోవింద్ నగర్లోని నీరాలా నగర్ రైల్వే గ్రౌండ్లో కానీ, లేదా కాన్పూర్-ఉన్నావ్ రహదారిపై కానీ భారీ బహిరంగ సభను నిర్వహించేందుకు అధికారులు తగిన వేదికలను ముమ్మరంగా సిద్ధం చేస్తున్నారు.
ఐదు భారీ ప్రాజెక్టులతో నగర రూపురేఖల మార్పు:
ది హిందూ, టైమ్స్ ఆఫ్ ఇండియా ప్రచురించిన తాజా కథనాల ప్రకారం, ఈ చారిత్రక పర్యటనలో ప్రధాని మోదీ 660 మెగావాట్ల విద్యుత్ ఉత్పత్తి సామర్థ్యం ఉన్న ‘ఘటంపూర్ థర్మల్ పవర్ ప్లాంట్’, ‘కాన్పూర్-లక్నో ఎక్స్ప్రెస్వే’, ‘అన్వర్గంజ్-మంధానా ఎలివేటెడ్ రైల్వే ట్రాక్’, ‘రామదేవి నుంచి గోల్ చౌరహా వరకు నిర్మించనున్న భారీ ఎలివేటెడ్ ట్రాక్’, ‘కాన్పూర్ సెంట్రల్ స్టేషన్ నుంచి నౌబస్తా వరకు నూతనంగా నిర్మించిన కాన్పూర్ మెట్రో’ సేవలను జెండా ఊపి లాంఛనంగా ప్రారంభిస్తారు. ఈ ప్రాజెక్టులు అందుబాటులోకి వస్తే దాదాపు 50 లక్షల మంది నగర జనాభాకు ప్రత్యక్షంగా, పరోక్షంగా ఎంతో మేలు జరగనుంది. విద్యుత్, రవాణా, మౌలిక సదుపాయాల కల్పనలో కాన్పూర్ దేశంలోనే ఆదర్శ నగరంగా మారుతుంది.
ప్రభుత్వ అధికారిక వర్గాల తెలిపిన వివరాల ప్రకారం, ముఖ్యమంత్రి యోగి ఆదిత్యనాథ్ ఎంతో ప్రతిష్టాత్మకంగా భావించే 63 కిలోమీటర్ల పొడవైన కాన్పూర్-లక్నో ఎక్స్ప్రెస్వే పనులు దాదాపు పూర్తి కావొచ్చాయి. సుమారు రూ. 3,000 కోట్ల అంచనా వ్యయంతో అత్యున్నత సాంకేతిక ప్రమాణాలతో నిర్మించిన ఈ ఎక్స్ప్రెస్వే అందుబాటులోకి వస్తే, ప్రస్తుతం కాన్పూర్, లక్నో మధ్య ఉన్న 3 గంటల సుదీర్ఘ ప్రయాణ సమయం కేవలం 30 నుంచి 40 నిమిషాలకు తగ్గుతుంది. రెండు నగరాల మధ్య నిత్యం రాకపోకలు సాగించే వేల మంది ప్రయాణికులకు ట్రాఫిక్ కష్టాలను ఇది శాశ్వతంగా తొలగిస్తుందని అధికారిక వర్గాలు ధృవీకరించాయి.
సాధారణంగా అన్వర్గంజ్ స్టేషన్ నుంచి మంధానా వరకు ఉన్న ప్రస్తుత రైల్వే లైన్ పరిధిలో సుమారు 16 రైల్వే క్రాసింగ్ల వల్ల నగరంలో భారీగా ట్రాఫిక్ జామ్లు ఏర్పడుతున్నాయి. ఈ సమస్యను శాశ్వతంగా నివారించేందుకు, రైల్వే క్రాసింగ్లకు సమాంతరంగా కొత్తగా ఒక ఎలివేటెడ్ ట్రాక్ నిర్మాణం చేపట్టనున్నారు. అలాగే, సుమారు రూ. 1,000 కోట్ల భారీ వ్యయంతో రామదేవి కూడలి నుంచి గోల్ చౌరహా వరకు తొలిసారిగా ఎలివేటెడ్ ట్రాక్ నిర్మిస్తున్నట్లు ఈటీవీ భారత్ తమ కథనంలో స్పష్టంగా తెలిపింది. ఈ ప్రాజెక్టులు పూర్తయితే ఫరూఖాబాద్, కనౌజ్, అలీగఢ్ మీదుగా లక్నో, ప్రయాగ్రాజ్ వెళ్లే ప్రయాణికులు జరీబ్ చౌకీ, అఫీమ్కోఠి, టాటా మిల్ వంటి రద్దీ కూడళ్లలో ట్రాఫిక్లో చిక్కుకోకుండా అత్యంత సులభంగా, వేగంగా తమ గమ్యస్థానాలకు చేరుకోగలుగుతారు.
కాన్పూర్ రవాణా చరిత్రలో తొలిసారిగా కాన్పూర్ దక్షిణ ప్రాంతంలో మెట్రో సేవలు లాంఛనంగా ప్రారంభం కానున్నాయి. కాన్పూర్ సెంట్రల్ స్టేషన్ నుండి నౌబస్తా వరకు ప్రయాణికులు మెట్రోలో ప్రయాణించవచ్చు. దీని వల్ల కాన్పూర్ సౌత్లో నివసిస్తున్న సుమారు 10 లక్షల మందికి మెరుగైన రవాణా సదుపాయం లభిస్తుంది. ప్రస్తుతం ఐఐటీ కాన్పూర్ నుంచి ఇప్పటికే ఉన్న 16 మెట్రో స్టేషన్లకు అదనంగా మరిన్ని స్టేషన్లు అందుబాటులోకి వస్తాయి. అలాగే రావత్పూర్, కళ్యాణ్పూర్ పాత స్టేషన్లను మూసివేసి, మాజీ ప్రధాని అటల్ బిహారీ వాజ్పేయి పేరుతో అత్యాధునిక సౌకర్యాలతో కూడిన కొత్త మెట్రో స్టేషన్ నిర్మించనున్నారు.
Click here to add News18 as your preferred news source on Google. బ్రేకింగ్ న్యూస్, రాజకీయాలు, దేశంలోని అన్ని రాష్ట్రాల్లోని ముఖ్యమైన వార్తలు, విశ్లేషణ, కేంద్ర ప్రభుత్వ పథకాలకు సంబంధించిన స్టోరీలను న్యూస్18 తెలుగు నేషనల్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
